'కేఎల్ రాహుల్.. కత్తి కంటే పదునైన క్రికెటర్'

ప్రస్తుత టీమిండియా తరఫున అద్భుతంగా రాణిస్తున్న కేఎల్ రాహుల్​.. కత్తి కంటే పదునుగా ఉన్నాడని అన్నాడు మాజీ క్రికెటర్ మహ్మద్ కైఫ్. ట్విట్టర్​ వేదికగా అతడిపై ప్రశంసలు కురిపించాడు.

న్యూజిలాండ్​తో బుధవారం జరిగిన తొలి వన్డేలో భారత్ ఓడింది. 4 వికెట్ల తేడాతో పరాజయం పాలైంది. కానీ ఈ మ్యాచ్​లో బ్యాటింగ్​తో ఆకట్టుకున్న కేఎల్ రాహుల్​పై ట్విట్టర్​ వేదికగా ప్రశంసలు కురిపించాడు టీమిండియా మాజీ క్రికెటర్ మహ్మద్ కైఫ్. అతడు ప్రస్తుతం కత్తి కంటే పదునుగా ఉన్నాడని రాసుకొచ్చాడు.

'ప్రస్తుతం కేఎల్ రాహుల్ కత్తి కంటే పదునుగా ఉన్నాడు. ఓపెనర్​గా, వికెట్ కీపర్​గా, వన్​డౌన్​ బ్యాట్స్​మెన్​గా ఆకట్టుకున్నాడు. ఇప్పుడు ఐదో స్థానంలోనూ వచ్చి ఉత్తమ ఫినిషర్​గా నిరూపించుకున్నాడు. ఇలా ఏ స్థానంలో ఆడినా సరే రెచ్చిపోతున్నాడు. రాహుల్ నీ ఆటతీరును కొనసాగించాలని కోరుకుంటున్నా' -ట్విట్టర్​లో మహ్మద్ కైఫ్

కివీస్​తో జరిగిన తొలివన్డేలోనూ ఐదో స్థానంలో వచ్చి, కేవలం 64 బంతుల్లోనే 88 పరుగులు చేశాడు. ఇందులో 6 సిక్సర్లు, 4 ఫోర్లు ఉన్నాయి. ఈ వన్డే సిరీస్​కు రోహిత్‌ శర్మ, శిఖర్‌ ధావన్‌ గైర్హాజరుతో పృథ్వీషా, మయాంక్‌ అగర్వాల్‌లు ఓపెనింగ్​కు దిగారు. ఈ కారణంతోనే రాహుల్‌ ఐదో స్థానంలో బ్యాటింగ్​కు వచ్చాడు. ఇలా ఏ స్థానంలో వచ్చినా సరే తన విధ్వంసకర ఆటతీరుతో రాహుల్‌ జట్టులో తన స్థానాన్ని మరింత సుస్థిరం చేసుకున్నాడు.