ఎమ్మెల్యే కారుకు నిప్పంటించిన యువకుడు Youth sets fire mla car: హరియాణా పానీపత్ భాజపా ఎమ్మెల్యే ప్రమోద్ విజ్ కారుకు ఓ గుర్తు తెలియని యువకుడు నిప్పంటించాడు. వాహనం చండీగఢ్ ఎమ్మెల్యే హాస్టల్లో పార్కు చేసి ఉండగా.. మంగళవారం అర్ధరాత్రి 12:30 గంటల సమయంలో ఈ చర్యకు పాల్పడ్డాడు. ఘటన సమయంలో కారులో గానీ, చుట్టుపక్కల గానీ ఎవరూ లేకపోవడం వల్ల ప్రాణనష్టం జరగలేదు.
ఎమ్మెల్యే కారుకు నిప్పంటించిన యువకుడు తనకు ఎవరూ శత్రువులు లేరని, అల్లరిమూకల్లో ఒకరే ఈ పని చేసి ఉంటారని ఎమ్మెల్యే ప్రమోద్ విజ్ అనుమానం వ్యక్తం చేశారు. నిందితుడ్ని త్వరలోనే పోలీసులు పట్టుకుంటారని చెప్పారు.
ఇదీ జరిగింది..
Panipat mla car fire
మంగళవారం హరియాణా కేబినెట్ విస్తరణ సందర్భంగా ఎమ్మెల్యే ప్రమోద్ విజ్ చండీగఢ్ వచ్చారు. ఆయన పంచకులలో బస చేసినప్పటికీ కారు డ్రైవర్, భద్రతా సిబ్బంది మాత్రం ఎమ్మెల్యే హాస్టల్కు వెళ్లారు. అర్ధరాత్రి 12:30గంటల సమయంలో గుర్తు తెలియని వ్యక్తి కారు దగ్గరకు వచ్చాడు. అద్దాన్ని ధ్వంసం చేశాడు. ఇంతలో కారు సైరన్ మోగగానే డ్రైవర్ హాస్టల్ నుంచి బయటకు వచ్చాడు. అతడ్ని చూసి ఆగంతుకుడు పరుగులు తీశాడు. అనంతరం కాసేపటికే అతడు మళ్లీ తిరిగివచ్చాడు. ఈసారి పెట్రోల్ బాటిల్తో వచ్చి కారుపై పోశాడు. అనంతరం నిప్పంటించి అక్కడి నుంచి పారిపోయాడు. అగ్నిమాపక దళం రంగంలోకి మంటలను అదుపు చేసింది. ఈ ఘటనలో ఎమ్మెల్యే టోయోటా ఫార్చునర్ ముందుభాగం పూర్తిగా కాలిపోయింది.
సీసీటీవీలో ఈ దృశ్యాలన్నీ రికార్డయ్యాయి. ఆగంతుకుడు మద్యం మత్తులో ఉండి ఈ పని చేసి ఉంటాడని పోలీసులు అనుమానిస్తున్నారు. కేసు నమోదు చేసి దర్యాప్తు చేపట్టారు. ఈ ఘటనలో మొత్తం ముగ్గురి ప్రమేయం ఉందని భావిస్తున్నారు. వారి కోసం గాలిస్తున్నారు.
ఈ విషయాన్ని హరియాణా అసెంబ్లీ స్పీకర్ జ్ఞాన్చంద్ దృష్టికి ఎమ్మెల్యే ప్రమోద్ విజ్ తీసుకెళ్లారు. ఘటనా స్థలాన్ని పరిశీలించిన ఆయన.. ఇంతటి కట్టుదిట్టమైన భద్రత గల ప్రదేశంలో ఇలా జరగడంపై ఆందోళన వ్యక్తం చేశారు. మరోసారి ఇలాంటి ఘటనలు పునరావృతం కాకుండా పంజాబ్, హరియాణా అధికారులతో ఉమ్మడి సమీక్ష నిర్వహిస్తామన్నారు. శాంతిభద్రతల విషయంలో మరింత పకడ్బందీగా వ్యవహరించాల్సిన అవసరం ఉందన్నారు.
కేంద్రపాలిత ప్రాంతమైన చండీగఢ్.. పంజాబ్, హరియాణాకు ఉమ్మడి రాజధానిగా ఉంటోంది.
ఇదీ చదవండి:ఇంజినీరింగ్ కాలేజీలో కరెంట్ షాక్.. నలుగురు మృతి
