YCP Leaders Attacks on TDP Leaders: పల్నాడు జిల్లాలో రెచ్చిపోయిన వైఎస్సార్​సీపీ శ్రేణులు.. టీడీపీ ఇంఛార్జిపై దాడి..

YCP Leaders Attacks on TDP Leaders: పల్నాడు జిల్లా నరసరావుపేటలో మరోసారి ఉద్రిక్తత పరిస్థితులు తలెత్తాయి. అధికారపార్టీ నాయకులు విధ్వంసం సృష్టించారు. తెలుగుదేశం నాయకులు, కార్యకర్తలనే లక్ష్యంగా చేసుకుని వారిపై కర్రలు, రాళ్లతో దాడికి పాల్పడ్డారు. ఈ ఘటనలో తెలుగుదేశం పార్టీ నియోజకవర్గ ఇంఛార్జి చదలవాడ అరవిందబాబుతోపాటు ఆయన డ్రైవర్‌, పలువురు కార్యకర్తలు గాయపడ్డారు.

YCP Leaders Attacks on TDP Leaders: ఎన్నికల సమయం దగ్గరపడుతున్న కొద్దీ పల్నాడు జిల్లాలో ఉద్రిక్తతలు మరింత ఎక్కువతున్నాయి. ముఖ్యంగా అధికారపక్షం దౌర్జన్యాలు మరింత మితిమీరాయి. నరసరావుపేటలో వైఎస్సార్​సీపీ ఎమ్మెల్యే అవినీతి గురించి ప్రశ్నించిన తెలుగుదేశం నేత ఇంటిపై.. ఆ పార్టీశ్రేణులు దాడికి పాల్పడ్డాయి. అడ్డుకోబోయిన తెలుగుదేశం నేతలపైనా రాళ్లదాడికి దిగారు. తెలుగుదేశం నాయకులు, కార్యకర్తలే లక్ష్యంగా కర్రలు, రాళ్లతో దాడికి పాల్పడ్డారు. ఈ ఘటనలో తెలుగుదేశం పార్టీ నియోజకవర్గ ఇంఛార్జి చదలవాడ అరవిందబాబుతోపాటు ఆయన డ్రైవర్‌, పలువురు కార్యకర్తలు గాయపడ్డారు.

ఎమ్మెల్యే గోపిరెడ్డి శ్రీనివాసరెడ్డి సమక్షంలోనే వైఎస్సార్​సీపీ నాయకులు రెచ్చిపోయారు. తెలుగుదేశం నేత చల్లా సుబ్బారావు ఓ ఛానెల్‌కు ఇచ్చిన ఇంటర్వ్యూలో ఎమ్మెల్యే శ్రీనివాసరెడ్డిపై అవినీతి ఆరోపణలు చేశారంటూ వైఎస్సార్​సీపీ శ్రేణులు బీభత్సం సృష్టించాయి. తొలుత చల్లా సుబ్బారావు ఇంటిపై కర్రలు, రాళ్లతో దాడికి పాల్పడిన వైఎస్సార్​సీపీ కార్యకర్తలు.. ఆయన ఇంటిలోని ఫర్నిచర్, కిటికీలు ధ్వంసం చేశారు. సుబ్బారావు ఇంటికి సమీపంలోని ఓ ప్రవాసాంధ్రుడి ఇంటి వ్యవహారంపై కొన్నాళ్లుగా టీడీపీ, వైఎస్సార్​సీపీ వర్గీయుల మధ్య గొడవ జరుగుతోంది. ఈ విషయంపై తొలుత గొడవకు దిగిన వైఎస్సార్​సీపీ నాయకులు.. అనంతరం ఎమ్మెల్యేపై అవినీతి ఆరోపణలు చేశారంటూ దాడికి పాల్పడ్డారు. విషయం తెలుసుకుని అక్కడి చేరుకున్న టీడీపీ ఇంఛార్జి చదలవాడ అరవిందబాబుపై వైఎస్సార్​సీపీ కార్యకర్తలు దాడికి యత్నించారు.

తెలుగుదేశం శ్రేణులు వారిని అడ్డుకోగా.. వారందరిపైనా రాళ్లదాడికి పాల్పడ్డారు. దీంతో ఇరువర్గాలు పరస్పర దాడులకు పాల్పడటంతో ఉద్రిక్తత పరిస్థితులు తలెత్తాయి. దాడి జరుగుతుండగానే అక్కడి చేరుకున్న వైఎస్సార్​సీపీ ఎమ్మెల్యే గోపిరెడ్డి శ్రీనివాసరెడ్డిని చూసి వైఎస్సార్​సీపీ శ్రేణులు మరింత రెచ్చిపోయాయి. టీడీపీ నేతల వాహనాలను ధ్వంసం చేశారు. ఈ దాడిలో అరవిందబాబు డ్రైవర్‌ తలకు తీవ్ర గాయమైంది. టీడీపీ నాయకులు, కార్యకర్తలు వాహనాల్లో తలదాచుకోవడానికి వెళ్తుంటే వాటిని వెంబడించి ధ్వంసం చేశారు. కార్లు వదిలేసి వెళ్తుండగా రాళ్లు రువ్వడంతో టీడీపీ కార్యకర్తలు, నాయకులు గాయపడ్డారు. ఎమ్మెల్యే సమక్షంలోనే వైఎస్సార్​సీపీ నేతలు దౌర్జన్యానికి పాల్పడ్డారని టీడీపీ నేత అరవిందబాబు ఆరోపించారు.

పట్టణంలో ఉద్రిక్తత పరిస్థితులు నెలకొన్నా పోలీసులు సకాలంలో స్పందించలేదని తెలుగుదేశం నేతలు ఆరోపించారు. దాడికి పాల్పడుతున్నవారిని చెదరగొడున్న పోలీసులపైనా వైసీపీ కార్యకర్తలు ఎదురుతిరిగారు. దీంతో పోలీసులు వైఎస్సార్​సీపీ వారిని వదిలేసి, టీడీపీ శ్రేణుల్ని చెదరగొట్టడంపైనే దృష్టిపెట్టారు. ఒకవైపు వైఎస్సార్​సీపీ కార్యకర్తలు కర్రలు, రాళ్లతో బీభత్సం సృష్టిస్తుంటే ఎక్కువమంది పోలీసులు ఎమ్మెల్యే గోపిరెడ్డికి రక్షణగా నిలిచారన్న ఆరోపణలు ఉన్నాయి. తెలుగుదేశం నేతలే ఇంటిని ఆక్రమించుకుంటే అడ్డుకున్నామని ఎమ్మెల్యే గోపిరెడ్డి తెలిపారు. ఇరువర్గాలను చెదరగొట్టి పోలీసులు పరిస్థితిని అదుపులోకి తీసుకొచ్చారు.