తమిళనాడులో వైస్ ఛాన్సలర్ పదవిని రూ.40-50 కోట్లకు విక్రయించారని పంజాబ్ గవర్నర్ బన్వారీలాల్ పురోహిత్ వ్యాఖ్యానించారు. శుక్రవారం ఓ మీడియా సమావేశంలో మాట్లాడిన పురోహిత్.. ఈ మేరకు ఆరోపణలు చేశారు. "నేను తమిళనాడు గవర్నర్గా నాలుగేళ్లు పని చేశాను. అక్కడ పరిస్థితి చాలా దారుణంగా ఉండేది. ఒక్కో వీసీ పోస్ట్ రూ.40 కోట్ల నుంచి రూ.50 కోట్లకు అమ్ముడు పోయేది" అని గవర్నర్ వ్యాఖ్యానించారు.
తమిళనాడు గవర్నర్ హోదాలో తాను 27 మంది వీసీలను చట్టబద్ధంగా నియమించారని తెలిపిన బన్వారీలాల్.. పంజాబ్ రాష్ట్రం ఈ నియామకాల నుంచి నేర్చుకోవాల్సి ఉందని తెలిపారు. పంజాబ్ అగ్రికల్చర్ యూనివర్సిటీ వైస్ ఛాన్స్లర్ డాక్టర్ సత్బీర్ సింగ్ గోసల్‌ను చట్టవిరుద్ధంగా నియమించారని పురోహిత్ ఆరోపించారు. ఆయన్ను ఆ పదవి నుంచి తొలగించాలని గతంలో పంజాబ్ ముఖ్యమంత్రి భగవంత్ మాన్‌ను కోరారు.
మరోవైపు, యూనివర్సిటీ కార్యకలాపాల్లో గవర్నర్ జోక్యం చేసుకుంటున్నారని పంజాబ్ సీఎం చేసిన వ్యాఖ్యలపై బన్వారీలాల్ స్పందించారు. రాష్ట్ర ప్రభుత్వాలే ఈ విషయంపై జోక్యం చేసుకోకూడదని హితవు పలికారు.