వందే భారత్.. ఇప్పుడిప్పుడే దీని పేరు అందరికీ వినిపిస్తోంది. ఇటీవలే సికింద్రాబాద్-తిరుపతి మధ్య నడిచే వందేభారత్ రైలును ప్రారంభించారు ప్రధాని నరేంద్ర మోదీ. ఇదిలా ఉంటే ఈ రైళ్లు గంటకు ఎన్ని కిలోమీటర్ల వేగంతో ప్రయాణిస్తున్నాయో చెప్పాలని భారతీయ రైల్వేకు సమాచార హక్కు చట్టం(ఆర్టీఐ)కింద మధ్యప్రదేశ్కు చెందిన చంద్ర శేఖర్ గౌర్ అనే వ్యక్తి దరఖాస్తు చేశారు. అందుకు సమాధానంగా వీటి వేగం గంటకు సగటున 83 కి.మీల వేగంతో నడుస్తున్నాయని రైల్వే శాఖ వివరణ ఇచ్చింది.
వందేభారత్ రైలు వాస్తవ సామర్థ్యం అధికంగా ఉన్నప్పటికీ.. దాని గరిష్ఠ వేగం ట్రాకుల సామర్థ్యంపై ఆధారపడి ఉంటుందని రైల్వే అధికారులు తెలిపారు. కొన్ని సందర్భాల్లో ఈ ఎక్స్ప్రెస్ వేగం గంటకు 95 కి.మీలు కూడా ప్రయాణిస్తోందని చెప్పారు. సెమీ హైస్పీడ్ రైలుగా కూడా పిలిచే ఈ ట్రైన్ 2021-22లో గంటకు 84.48 కి.మీల వేగంతో నడిచిందని.. 2022-23లో 81.38 కి.మీల వేగంతో ప్రయాణిస్తోందని వివరించారు. ప్రస్తుతం ఇదే సర్వీస్ 83 కి.మీల స్పీడ్తో నడుస్తోందని స్పష్టం చేశారు.
స్పీడ్లో ఆ సర్వీస్ ఫస్ట్.. షిర్డీ ఎక్స్ప్రెస్ లాస్ట్!
దిల్లీ-వారణాసి మధ్య 2019లో మొట్టమొదటి వందే భారత్ ఎక్స్ప్రెస్ సర్వీస్ ప్రారంభమయింది. దీని వేగం సగటున గంటకు 95 కి.మీలు ఉండగా.. ముంబయి-షిర్డీ మధ్య నడుస్తున్న ఎక్స్ప్రెస్ వేగం అత్యల్పంగా గంటకు కేవలం 64 కి.మీలే అని రైల్వే అధికారులు వెల్లడించారు. రాణి కమలాపతి(హబీబ్‌గంజ్)- హజ్రత్ నిజాముద్దీన్ మార్గంలో నడుస్తున్న వందే భారత్ రైలు సగటున గంటకు 94 కి.మీల వేగంతో రెండవ స్థానంలో ఉంది. మొత్తంగా ఎప్పటి నుంచో సేవలందిస్తున్న రాజధాని, శతాబ్ది ఎక్స్ప్రెస్ రైళ్ల కంటే వందే భారత్ రైళ్లు మెరుగైన సేవలందిస్తున్నాయని అధికారులు తెలిపారు.
వందే భారత్ రైలు మొదటి వర్షన్ 2018 అక్టోబరులో రూపుదిద్దుకుంది. ట్రయిల్ రన్లో భాగంగా దీనిని పరీక్షించగా గంటకు 180 కి.మీల వేగంతో పరుగులు పెట్టిందని ఓ రైల్వే అధికారి చెప్పారు. దేశంలో ప్రస్తుతం 14 ప్రధాన మార్గాల్లో వందే భారత్ ఎక్స్ప్రెస్ సేవలు అందుబాటులో ఉన్నాయి. దేశంలోనే మొట్టమొదటి ఎలక్ట్రిక్ ట్రైన్గా పేరు సంపాదించిన వందే భారత్ ఎక్స్‌ప్రెస్ను రీసెర్చ్ డిజైన్స్ అండ్ స్టాండర్డ్స్ ఆర్గనైజేషన్ రూపొందించింది. దీనిని చెన్నైలోని ఐసీఎఫ్(ఇంటీగ్రల్ కోచ్ ఫ్యాక్టరీ) తయారు చేసింది.
భారత్లో అత్యంత ఫాస్టెస్ట్ ట్రైన్గా ఎంతో గుర్తింపు పొందింది వందే భారత్ ఎక్స్ప్రెస్. 2019లో ప్రారంభమయిన ఈ రైలు సర్వీసులు దేశ ప్రజలకు కాస్త ఊరట కలిగించినా.. వీటి స్పీడ్ విషయంలో మాత్రం రాజీపడక తప్పడంలేదు. గంటకు గరిష్ఠంగా 180 కి.మీల వేగంతో, అదే వాణిజ్య అవసరాలకు 130 కి.మీల స్పీడ్తో నడిచేలా రూపొందించిన ఈ ట్రైన్.. ప్రస్తుతం కేవలం 83 కి.మీలే ప్రయాణిస్తోందని రైల్వే శాఖ చెప్పడం తీవ్ర విమర్శలకు దారితీస్తోంది.
