సుప్రీం కోర్టు, హైకోర్టుల్లో ఖాళీలు.. భర్తీ ఎప్పుడు?

దేశ అత్యున్నత న్యాయస్థానం, హైకోర్టుల్లో భారీగా ఖాళీలు ఉన్నాయి. సుప్రీంకోర్టులో ఏడు ఖాళీలు ఉండగా.. మరో రెండు హైకోర్టుల్లోని ప్రధాన న్యాయమూర్తులు వచ్చే రెండు మూడు నెలల్లో పదవీ విరమణ పొందనున్నట్లు అధికారులు తెలిపారు. దేశంలోని 25 హైకోర్టుల్లో దాదాపు 60 శాతం న్యాయమూర్తులతోనే సేవలందిస్తున్నాయి.

దేశ అత్యున్నత న్యాయస్థానం సుప్రీం కోర్టులో ఏడు ఖాళీలు ఏర్పడ్డాయి. మరో రెండు హైకోర్టులు తాత్కాలిక ప్రధాన న్యాయమూర్తులతోనే పనిచేస్తున్నాయి. మరో రెండు హైకోర్టుల్లోని ప్రధాన న్యాయమూర్తులు వచ్చే రెండు మూడు నెలల్లో పదవీ విరమణ పొందనున్నట్లు కేంద్ర ప్రభుత్వ వర్గాలు తెలిపాయి. ఖాళీల భర్తీకి సుప్రీం కొలీజియం సిఫార్సుల కోసం ప్రభుత్వం వేచి చూస్తున్నట్లు పేర్కొన్నాయి.

2019లో అప్పటి ప్రధాన న్యాయమూర్తి రంజన్ గొగొయి పదవీ విరమణ పొందగా.. సుప్రీంకోర్టులో మొదటి ఖాళీ ఏర్పడింది. ఆ తర్వాత గత నెల ఐదుగురు న్యాయమూర్తులు పదవీ విరమణ పొందారు. మరో న్యాయమూర్తి జస్టిస్ మోహన్ ఎం శాంతానుగౌడర్ మృతిచెందారు. దీంతో సుప్రీంకోర్టులో ఏడు ఖాళీలు ఏర్పడ్డాయి.

దేశంలోని 25 హైకోర్టుల్లో మొత్తం.. న్యాయవాదుల సంఖ్య 1,080 ఉండాలి, కానీ ప్రస్తుతం 660 మందే విధులు నిర్వర్తిస్తున్నారు.

సాధారణంగా హైకోర్టుల్లో న్యాయమూర్తుల నియామకాల కోసం పేర్లను హైకోర్టు కొలీజియం కేంద్ర న్యాయశాఖకు సిఫార్సు చేస్తుంది. పరిశీలన అనంతరం సుప్రీం కొలీజియంకు పంపుతుంది న్యాయశాఖ. సుప్రీం కొలీజియం అందులోంచి కేంద్రానికి సిఫార్సు చేస్తుంది. అందులోని పేర్లు ఓకే అయితే.. ఆమోదిస్తుంది కేంద్రం. లేదా మరోమారు పరిశీలించాలని తిప్పి పంపుతుంది.

ఇదీ చదవండి:రోజంతా రావిచెట్టుపైనే మకాం.. ఎందుకంటే?