Dalit Girl Cummits Suicide: ఓ యువకుడి వేధింపులతో మనస్తాపానికి గురైన దళిత విద్యార్థిని.. ఉరివేసుకొని ఆత్మహత్య చేసుకున్న ఘటన ఉత్తర్ప్రదేశ్ పీలీభీత్లో జరిగింది. సున్గఢీ పోలీస్ స్టేషన్ పరిధిలో.. ఆదివారం అర్ధరాత్రి తర్వాత బాలిక చనిపోయినట్లు తెలుస్తోంది. ఉరికి వేలాడుతున్న కుమార్తెను చూసిన కుటుంబ సభ్యులు.. పోలీసులకు సమాచారం అందించారు. సంఘటనా స్థలానికి చేరుకున్న పోలీసులు.. మృతదేహాన్ని పోస్టుమార్టం కోసం జిల్లా ఆస్పత్రికి తరలించారు.
21 ఏళ్ల ఓ యువకుడు.. తమ కుమార్తెను పలుమార్లు వేధించాడని బాధితురాలి కుటుంబసభ్యులు ఆరోపించారు. అతడిని హెచ్చరించినా వినలేదని చెప్పారు. నిత్యం చేసే వేధింపులు భరించలేకే మనస్తాపంతో తమ కుమార్తె ఆత్మహత్య చేసుకుందని వాపోయారు. మరోవైపు.. ఈ ఘటనపై బాధితురాలి కుటుంబం నుంచి ఎలాంటి ఫిర్యాదు అందలేదని పోలీసులు తెలిపారు. ఫిర్యాదు చేస్తే నిందితులను పట్టుకుంటామని వివరించారు.