ఉత్తరాఖండ్లో నాయకత్వ మార్పుపై గత కొంత కాలంగా వస్తున్న ఊహాగానాలకు తెరపడింది. ఆ రాష్ట్ర ముఖ్యమంత్రి త్రివేంద్ర సింగ్ రావత్.. తన పదవికి రాజీనామా చేశారు. గవర్నర్ రాణి మౌర్యను మంగళవారం సాయంత్రం కలిసిన రావత్.. రాజీనామా లేఖను సమర్పించారు.
అనంతరం.. మీడియాతో మాట్లాడారు రావత్. తాను ఎన్నడూ ముఖ్యమంత్రి అవుతానని అనుకోలేదని.. కానీ నాలుగేళ్ల పాటు ఆ పదవిలో కొనసాగానని చెప్పారు. ఆ అవకాశం ఇచ్చిన భాజపా అధిష్ఠానానికి ధన్యవాదాలు తెలిపారు. అప్పుడు పార్టీ ఆదేశాలతో సీఎం బాధ్యతలు చేపట్టానని.. ఇప్పుడు హైకమాండ్ నిర్ణయంతో పదవిని వీడానని స్పష్టం చేశారు.
ఈ సందర్భంగా.. 'రాజీనామా వెనకున్న అసలు కారణం ఏంటి?' అని విలేకరులు ప్రశ్నించారు. దానికి సమాధానం కావాలంటే.. అందరూ దిల్లీ వెళ్లాలని అన్నారు రావత్.
బుధవారం భాజపా కార్యాలయంలో శాసనసభాపక్ష సమావేశం జరుగుతుందని.. అందులో తదుపరి సీఎంను ఎన్నుకుంటారని రావత్ స్పష్టం చేశారు.
అదే కారణం...!
సొంత పార్టీలో త్రివేంద్ర సింగ్కు అసమ్మతి సెగ తగిలింది. మంత్రులతో పాటు 20మంది ఎమ్మెల్యేలు.. రావత్పై గత వారం ఆగ్రహం వ్యక్తం చేశారు. పార్టీ అధిష్ఠానానికి ఫిర్యాదు చేశారు. ఈ నేపథ్యంలో.. ఉత్తరాఖండ్ భాజపాలో తలెత్తిన సంక్షోభాన్ని పరిష్కరించేందుకు ఏర్పాటు చేసిన కమిటీ.. ఈ నెల 8న నివేదికను సమర్పించింది.
మరోవైపు.. రావత్ ధోరణి కూడా ఈ పరిణామాలకు ఓ కారణంగా తెలుస్తోంది. స్వతంత్రంగా నిర్ణయాలు తీసుకోవడం, చర్యలు చేపట్టడం రావత్ శైలి. దీనిపై పార్టీలోని పలువురు అసంతృప్తితో ఉన్నట్టు తెలిసింది. ఆయన పనితీరు కూడా సరిగా లేదని పార్టీలో అంతర్గత నివేదికలు పేర్కొన్నట్టు సమాచారం.
రేసులో..
రావత్ రాజీనామాతో.. తదుపరి సీఎం ఎవరవుతారనే విషయంపై సర్వత్రా ఉత్కంఠ నెలకొంది. సీఎం రేసులో రాష్ట్ర మంత్రి ధన్ సింగ్ రావత్, ఎంపీలు అజయ్ భట్, అనిల్ బలుని ఉన్నట్టు తెలుస్తోంది. ఓ డిప్యూటీ సీఎంను కూడా నియమించే యోచనలో పార్టీ ఉన్నట్టు సమాచారం. పుష్కర్ సింగ్ ధమికి ఆ బాధ్యతలు దక్కే అవకాశం ఉందని పార్టీ వర్గాలు వెల్లడించాయి.
ఇదీ చూడండి:-ఆ రాష్ట్ర భాజపాలో అసమ్మతి.. అధిష్ఠానానికి నివేదిక
