YS Viveka Murder Case Updates: మాజీ మంత్రి వివేకానంద రెడ్డి హత్య కేసులో దస్తగిరి అప్రూవర్‌గా మారడానికి కడప కోర్టు అనుమతించడాన్ని సవాల్ చేస్తూ కడప ఎంపీ వైఎస్ అవినాష్ రెడ్డి తండ్రి వైఎస్ భాస్కర్‌రెడ్డి, వివేకా పీఏ కృష్ణారెడ్డి దాఖలు చేసిన పిటిషన్లపై.. తెలంగాణ హైకోర్టులో విచారణ జరిగింది. హత్య కుట్రలో భాగంగా నిందితులకు 45 లక్షల రూపాయలు ఎలా అందాయనే అంశంపై దర్యాప్తు కొనసాగుతోందని.. హైకోర్టుకు సీబీఐ తెలిపింది. అసలైన కుట్రదారులు తప్పించుకోకూడదన్న ఉద్దేశంతో విచారణ చేస్తున్నట్లు పేర్కొంది.
హత్య కుట్రలో వైఎస్ భాస్కర్‌రెడ్డి ప్రమేయంపై ఆధారాలున్నాయని కోర్టుకు సీబీఐ తెలిపింది. కేవలం దస్తగిరి వాంగ్మూలమే కాకుండా.. ఇతర ఆధారాలు కూడా ఉన్నట్లు వివరించింది. ఈ నెల 30 నాటికి దర్యాప్తు పూర్తి చేయాలని సుప్రీంకోర్టు గడువు విధించగా.. విచారణ ముందుకు సాగకుండా పలు పిటిషన్లు వేసి అడ్డుకుంటున్నారని సీబీఐ ప్రత్యేక పబ్లిక్ ప్రాసిక్యూటర్ నాగేంద్రన్ తెలిపారు. దస్తగిరికి కడప కోర్టు ఉపశమనం కల్పించడాన్ని పిటిషనర్లు ప్రశ్నించడానికి వీల్లేదన్నారు.
భాస్కర్‌రెడ్డి ప్రతిపాదిత నిందితుడేనని, క్షమాభిక్షను కేసులోని నిందితులు కూడా ప్రశ్నించలేరని అన్నారు. దస్తగిరికి క్షమాభిక్షపై నిందితుడు శివశంకర్‌రెడ్డి వేసిన పిటిషన్‌లో సుప్రీంకోర్టు ఎలాంటి ఉత్తర్వులు ఇవ్వలేదన్నారు. సుప్రీంకోర్టులో తేలిన తర్వాత హైకోర్టు విచారణ జరపవద్దని సీబీఐ కోరింది.