రాజకీయాల్లో తలపండిన ఎన్డీఏ దిగ్గజ నేతలు ఓవైపు.. వాళ్ల అనుభవమంత వయసు కూడా లేని 31ఏళ్ల యువనేత మరోవైపు. ఇది బిహార్ ఎన్నికల సమరంలో దేశప్రజలు చూసింది. మహాకూటమిని విజయతీరానికి చేర్చడంలో త్రుటిలో విఫలమైనప్పటికీ.. ఇప్పుడు అందరిచూపు... ఆ యువనేతపైనే. ఆయనే.. ఆర్జేడీ 'యువశక్తి' తేజస్వీ యాదవ్.
యువరక్తం...
తేజస్వీ యాదవ్... లాలూ తర్వాత ఆర్జేడీ లాంతర్ పట్టుకునే వాళ్లెవరా? అని బిహార్లో జనం ఎదురుచూస్తున్న దశలో ముందుకొచ్చారు. మోదీ మేనియా, నితీశ్ విమర్శలను దీటుగా ఎదుర్కొంటూ పార్టీని ముందుకు నడిపించారు. తన తండ్రి లాలూ ప్రస్తుత శాసనసభ ఎన్నికల్లో లేని లోటును భర్తీ చేసేందుకు ఈ యువ నేత శక్తి వంచన లేకుండా కృషి చేశారు.
ఇవన్నీ చూస్తుంటే.. ఈ ఎన్నికలు కలిసిరాకపోయినా.. రానున్న రోజుల్లో తేజస్వీ ఓ అసాధారణ నేతగా ఎదిగే అవకాశం స్పష్టంగా కనిపిస్తోందని విశ్లేషకులు ఇప్పటికే అభిప్రాయపడుతున్నారు.
జాతీయ స్థాయిలో మోదీకి ఉన్న ఇమేజ్ తెలియనిది కాదు. అయితే బిహార్లో ప్రస్తుతం తేజస్వీ యాదవ్ అదే స్థాయి ఇమేజ్ను సంపాదించారు. ఎందుకంటే బిహార్ -2020 ఎన్నికలంతా.. 'తేజస్వీ x మిగిలిన నేతలు'గా నడిచింది.
మోదీ నోట తేజస్వీ మాట..
2014 లోక్సభ ఎన్నికలు మొత్తం మోదీ చుట్టూ ఎలా తిరిగాయో ఇప్పుడు 2020 బిహార్ శాసనసభ సమరం తేజస్వీ చుట్టూ తిరిగింది. మోదీ నుంచి నితీశ్ వరకు ఎన్డీఏ నేతలందరూ తేజస్వీ పేరు లేకుండా ప్రసంగాన్ని పూర్తి చేయలేదు. తేజస్వీ చేసే విమర్శలపై ప్రతిదాడి చేశారు. ఫలితంగా... అప్పటి వరకు ఎన్డీఏ నేతలకు విమర్శనాంశాలుగా ఉన్న లాలూ కుంభకోణాలు సహా ఇతర విషయాలు మరుగున పడిపోయాయి. తేజస్వీపై వ్యక్తిగత విమర్శలు చేసేందుకే నేతలు మొగ్గు చూపారు. వ్యక్తిగత విషయాల జోలికి ఎప్పుడూ వెళ్లని నితీశ్ సైతం ఒక్కోసారి సహనం కోల్పోయారు.
అగ్రనేతలందరూ ఓ యువనేతపై ఈ స్థాయిలో విరుచుకుపడటాన్ని చూస్తే చాలు.. రాష్ట్ర రాజకీయాల్లో తేజస్వీ ముద్ర ఎలా ఉందో అర్థంచేసుకోవచ్చు. మోదీ మాటల తూటాలను, నితీశ్ విమర్శనాస్త్రాలను ఎప్పటికప్పుడు ఎదుర్కొంటూ తేజస్వీ ముందుకు సాగిన తీరు.. అనేకమంది మన్ననలు పొందింది.
