Sivaji Krishnamurthy Comments On Kushboo : డీఎంకే పార్టీ నేత శివాజీ కృష్ణమూర్తిపై ఆ పార్టీ అధిష్ఠానం కఠిన చర్యలు తీసుకుంది. పార్టీ నుంచి ఆయన్ను బహిష్కరిస్తూ నిర్ణయం తీసుకున్నారు ఆ పార్టీ అధ్యక్షుడు, సీఎం స్టాలిన్. తమిళనాడు గవర్నర్‌ ఆర్.ఎన్.రవి, బీజేపీ నాయకురాలు ఖుష్బూపై అనుచిత వ్యాఖ్యలు చేసినందుకుగానూ ఈ నిర్ణయం తీసుకున్నారు. 2023 జనవరిలో.. తమిళనాడు గవర్నర్‌ను ఉద్దేశించి శివాజీ వివాదాస్పద వ్యాఖ్యలు చేశారు. దీంతో అతడిని పార్టీ నుంచి సస్పెండ్ చేస్తున్నట్లు అప్పట్లో డీఎంకే పార్టీ ప్రకటించింది. అయినప్పటికీ, ఆయన ప్రవర్తనలో ఎలాంటి మార్పు రాకపోవడం వల్ల తాజాగా డీఎంకే అధ్యక్షుడు స్టాలిన్.. శివాజీని పార్టీ నుంచి బహిష్కరిస్తున్నట్టు ప్రకటించారు. తర్వాత పోలీసులు అతడిని అరెస్ట్ చేశారు. వైద్య పరీక్షల కోసం ఆస్పత్రికి తరలించారు.
ఇటీవల నిర్వహించిన ఓ సమావేశంలో ఖుష్బూను ఉద్దేశిస్తూ శివాజీ కృష్ణమూర్తి అనుచిత వ్యాఖ్యలు చేశారు. దీంతో దుమారం చెలరేగింది. ఈ వీడియోను ట్విటర్‌లో పోస్టు చేసిన ఖుష్బూ.. సీఎం స్టాలిన్‌కు దాన్ని ట్యాగ్‌ చేశారు. శివాజీ తన పట్ల చేసిన వ్యాఖ్యలు సిగ్గుచేటని ఆమె అన్నారు. అవే వ్యాఖ్యలను మీ కుటుంబంలోని మహిళలకు అంటే మీరు ఊరుకుంటారా? అంటూ ఖుష్బూను ఆవేదన వ్యక్తం చేశారు.