సినీ ఫక్కీలో ప్రముఖ రాజకీయ నేతలు, వ్యాపారవేత్తలు, సినీ నటులే లక్ష్యంగా ఓ వ్యక్తి కోట్ల రూపాయలు దండుకున్నాడు. పోలీసులు అరెస్ట్ చేసి జైలుకు పంపితే.. అక్కడి నుంచీ తన పనితనాన్ని చూపించాడు. అతనే.. చెన్నైకి చెందిన సుకేశ్ చంద్రశేఖర్(conman Sukesh Chandrasekhar). కొన్ని సంవత్సరాలుగా.. పలువురు రాజకీయ నాయకులు, వ్యాపారవేత్తలే లక్ష్యంగా నేరాలకు పాల్పడుతున్నట్లు పోలీసులు తేల్చారు.
రూ.200 కోట్లు..
రాన్బాక్సీ మాజీ ప్రమోటర్లు మల్విందర్ సింగ్, శివిందర్ సింగ్లకు(former promoters of Ranbaxy, Malvinder Singh and Shivinder Singh) బెయిల్ ఇప్పిస్తానని నమ్మించి వారి భార్యల దగ్గర నుంచి ఏకంగా రూ.200 కోట్లు వసూలు చేశాడు సుకేశ్ చంద్రశేఖర్. శివిందర్ సింగ్ భార్య అదితి సింగ్ ఫిర్యాదు మేరకు కేసు నమోదు చేసి అరెస్ట్ చేసింది దిల్లీ ఆర్థిక నేరాల నిరోధక విభాగం(ఈఓడబ్ల్యూ). కేంద్ర న్యాయశాఖలోని ఉన్నతాధికారిగా పరిచయం చేసుకుని వారిని మోసం చేసినట్లు తేల్చారు.
"ఆగస్టు 7న దిల్లీ పోలీసు ప్రత్యేక విభాగంలో ఫిర్యాదు చేశారు అదితి సింగ్. 2020, జూన్లో తనకు ఓ కాల్ వచ్చిందని, కేంద్ర న్యాయశాఖలో సీనియర్ అధికారిగా పరిచయం చేసుకుని, తన భర్తకు బెయిల్ ఇప్పిస్తానని చెప్పినట్లు ఫిర్యాదులో అదితి పేర్కొన్నారు."
-ఆర్కే సింగ్, ఈఓడబ్ల్యూ అదనపు కమిషనర్.
రాన్బాక్సీ మాజీ ప్రమోటర్ల భార్యల నుంచి తీసుకున్న రూ.200 కోట్లతో చెన్నైలో ఓ ఖరీదైన బంగ్లా కొన్నట్లు గుర్తించారు అధికారులు. ఈ ఇంటిని లగ్జరీ ఫర్నీచర్తో అలంకరించినట్లు తెలిసింది. అలాగే.. మెర్సిడేస్ బెంజ్ 300 ఎస్ఎల్ఆర్ వంటి 16 ఖరీదైన కార్లు కొనుగోలు చేశాడు. ఎన్ఫోర్స్మెంట్ డైరెక్టరేట్ ఇటీవల దాడులు జరిపి.. బంగ్లాతో పాటు రూ.20 కోట్ల విలువైన వస్తువులను సీజ్ చేసింది.
మోసపోయిన సాహో నటి..
రూ.200 కోట్ల దోపిడి కేసులో చంద్రశేఖర్ సన్నిహితుడు లీనా మరియా పాల్ సహా.. బాలీవుడ్ హీరోయిన్ జాక్వెలిన్ ఫెర్నాండేజ్(sukesh chandrasekhar jacqueline)ను ఈడీ ఇటీవల ప్రశ్నించింది. ఈ విచారణలో జాక్వెలిన్ పలు కీలక విషయాలు వెల్లడించినట్లు తెలిసింది.
తిహాడ్ జైలు నుంచే కాలర్ ఐడీ స్పూఫింగ్ ద్వారా జాక్వెలిన్ ఫెర్నాండేజ్ను సుకేశ్ చంద్రశేఖర్(sukesh chandrasekhar and jacqueline) సంప్రదించినట్లు ఎన్ఫోర్స్మెంట్ డైరెక్టరేట్ వర్గాలు తెలిపాయి. తన గుర్తింపును దాచి పెట్టి, తనను తాను పెద్ద పలుకుబడి ఉన్న వ్యక్తిగా పరిచయం చేసుకుని ఆమెతో మాట్లాడేవాడని తెలుసుకున్నారు. అతన్ని జాక్వెలిన్ నమ్మటం ప్రారంభించిన క్రమంలో.. ఖరీదైన పూలు, చాక్లెట్లు బహుమతిగా పంపేవాడని చెప్పారు. సుకేశ్కు సంబంధించిన 20కిపైగా కాల్ రికార్డులు ఈడీ దగ్గర ఉన్నట్లు అధికారులు తెలిపారు. వాటి ద్వారా జాక్వెలిన్ను మోసగించిన వివరాలను రాబట్టనున్నట్లు చెప్పారు. భద్రతా కారణాల దృష్ట్యా పూర్తి వివరాలు వెల్లడించేందుకు నిరాకరించారు.
రూ.200 కోట్ల దోపిడీ కేసులో దిల్లీ పోలీసు ఆర్థిక నేరాల నిరోధక విభాగం(ఈఓడబ్ల్యూ) విచారణ కొనసాగిస్తోంది. సుకేశ్ చంద్రశేఖర్, లీనా పాల్లపై దేశవ్యాప్తంగా 23 చీటింగ్ కేసులు ఉన్నాయి.
ఇదీ చూడండి:అంతులేని కథగా జైళ్లలో మానవ హక్కుల హననం!
