అయోధ్యలో ఉద్రిక్తత... ఎస్పీ, భాజపా కార్యకర్తల మధ్య కాల్పులు!

SP BJP stone pelting: ఉత్తర్​ప్రదేశ్ ఎన్నికల ప్రచారం వాడీవేడీగా కొనసాగుతోంది. ఈ క్రమంలో అయోధ్యలో ఎస్పీ భాజపా మధ్య తీవ్ర ఉద్రిక్తత తలెత్తింది. ఇరువర్గాలు ఒకరిపై ఒకరు రాళ్లు రువ్వుకున్నారు. కాల్పులు సైతం జరిగినట్లు తెలుస్తోంది.

SP BJP stone pelting: ఉత్తర్​ప్రదేశ్ అయోధ్యలో భాజపా, సమాజ్​వాదీ పార్టీల మధ్య తీవ్ర ఉద్రిక్తత తలెత్తింది. గోసాయీగంజ్ అసెంబ్లీ నియోజకవర్గంలోని కబీర్​పుర్​లో ఇరుపార్టీల కార్యకర్తలు రాళ్లు రువ్వుకున్నారు. పోలీసు స్టేషన్ ఎదుటే ఈ ఘటన జరగడం విస్మయం కలిగిస్తోంది. కాల్పులు సైతం జరిగినట్లు తెలుస్తోంది.

పోలీస్ స్టేషన్​లో రాళ్లు

Ayodhya SP stone pelting

గోసాయీగంజ్ నియోజకవర్గాన్ని భాజపా, ఎస్పీ అత్యంత ప్రతిష్ఠాత్మకంగా భావిస్తున్నాయి. ఎస్పీ నుంచి అభయ్ సింగ్, భాజపా తరఫున ఎమ్మెల్యే ఇంద్ర ప్రతాప్ తివారి ఖబ్బూ సతీమణి ఆర్తీ తివారీ పోటీ చేస్తున్నారు. ప్రచారంలో భాగంగా రెండు వర్గాలకు చెందిన కార్లు ఎదురుపడ్డాయి. ఈ నేపథ్యంలో ఇరు పార్టీల కార్యకర్తల మధ్య తీవ్ర ఉద్రిక్తత తలెత్తింది. ఒకరిపై ఒకరు రాళ్లు రువ్వుకున్నారు. శుక్రవారం సాయంత్రం కాల్పులు సైతం జరిగినట్లు తెలుస్తోంది.

పోలీస్ స్టేషన్​

ఈ ఘటనపై ఎస్పీ నాయకులు పోలీస్ స్టేషన్​ను ఆశ్రయించారు. ఘర్షణలపై ఎలాంటి చర్యలు తీసుకోవడం లేదని ఆరోపిస్తూ పోలీస్ స్టేషన్​పైనా రాళ్లు విసిరారు. దీంతో బలగాలను ఉపయోగించి ఆందోళనకారులను పోలీసులు చెదరగొట్టారు.

బలగాల మోహరింపులు

BJP SP stone pelting

ఈ ఘటనలో ఎవరూ గాయపడలేదని ఎస్ఎస్​పీ శైలేశ్ పాండే తెలిపారు. నాలుగు వాహనాలు ధ్వంసమైనట్లు గుర్తించామని వెల్లడించారు. తమపై దాడి జరిగిందని రెండు పార్టీల కార్యకర్తలూ ఆరోపణలు చేశారని చెప్పారు. సామాజిక మాధ్యమాల్లో తప్పుడు వార్తలు ప్రచారమవుతున్నాయని, వాటిని నమ్మొద్దని ప్రజలకు సూచించారు. ప్రస్తుతం ఈ ప్రాంతంలో శాంతియుత పరిస్థితులు ఉన్నాయని స్పష్టం చేశారు. ఘటనపై ఇరుపక్షాల నుంచి వివరాలు సేకరిస్తున్నామని, దాని ఆధారంగా దర్యాప్తు చేపడతామని తెలిపారు.

ఇదీ చదవండి:అఖిలేశ్‌ ఆశల విడత- యాదవ్‌ల మద్దతుపై ఎస్పీ ధీమా