Islamic Countries Protest: మహమ్మద్‌ ప్రవక్తపై భాజపా నాయకురాలు నుపుర్ శర్మ చేసిన వ్యాఖ్యలు అంతర్జాతీయంగా మంటలు రేపుతున్నాయి. తమ మత విశ్వాసాలను కించపరిస్తే సహించేది లేదని ఇస్లామిక్ దేశాలు మండిపడుతుండగా... తమకు అన్ని మతాలూ సమానమేనని, ఎవరినీ అవమానించడం లేదని భారత్ స్పష్టంచేసింది. భాజపా నేతల వ్యాఖ్యలపై ఇప్పటికే తీవ్ర నిరసన తెలిపిన ఖతార్‌, కువైట్‌, ఇరాన్‌లతో సౌదీఅరేబియా, బహ్రెయిన్‌, అఫ్గానిస్థాన్‌, పాకిస్థాన్‌, ఇండోనేసియా, మాల్దీవులు, జోర్డాన్‌, యునైటెడ్‌ అరబ్‌ ఎమిరేట్స్‌(యూఏఈ), ఒమన్‌ దేశాలు గొంతు కలిపాయి. ఇస్లాం మత పవిత్రతను కించపరుస్తూ, ముస్లింలను రెచ్చగొట్టేలా మాట్లాడకుండా కట్టడి చేయాలని భారత ప్రభుత్వానికి సూచించాయి. 57 దేశాలకు ప్రాతినిధ్యం వహించే ఇస్లామిక్ సహకార సంస్థ (ఓఐసీ) జనరల్‌ సెక్రెటేరియెట్‌ భారత్‌లో ముస్లింల హక్కుల పరిరక్షణకు తగిన చర్యలు తీసుకోవాలంటూ ఐక్యరాజ్యసమితికి విజ్ఞప్తి చేసింది. మహమ్మద్‌ ప్రవక్తపై వివాదాస్పద వ్యాఖ్యలను ఖండిస్తూ సౌదీ అరేబియా, బహ్రెయిన్‌ సోమవారం ప్రకటన విడుదల చేశాయి. అన్ని వర్గాలను, విశ్వాసాలను గౌరవించాలని పేర్కొన్నాయి. వివాద కారకులపై భారతీయ జనతా పార్టీ తీసుకున్న చర్యలను స్వాగతించాయి. కువైట్‌ నగరంలోని అల్‌ అర్దియ కోఆపరేటివ్‌ సొసైటీకి చెందిన సూపర్ మార్కెట్‌ తన స్టోర్‌లోని భారతీయ ఉత్పత్తులను ఒక చోట పోగేసి ఆ వస్తువులను బహిష్కరిస్తున్నట్లు తెలిపింది. మహమ్మద్‌ ప్రవక్తను అవమానిస్తే ముస్లింలు సహించరని స్టోర్‌ సీఈవో నాసర్‌ అల్‌ ముతైరీ పేర్కొన్నారు. మక్కా, మదీనాల్లోని మసీదుల మత పెద్దలు కూడా వేర్వేరు ప్రకటనల్లో నుపుర్ శర్మ వ్యాఖ్యలను ఖండించారు.
భారత్ తీవ్ర అభ్యంతరం
ఓఐసీ ప్రకటనపై భారత్ తీవ్ర అభ్యంతరం తెలిపింది. వ్యక్తుల ఆలోచనలను ఒక దేశ ప్రభుత్వానికి ఎలా ఆపాదిస్తారంటూ విదేశీ వ్యవహారాల శాఖ ప్రశ్నించింది. పాక్ ప్రకటనపైనా మండిపడింది. ‘కొందరు వ్యక్తులు చేసిన వ్యాఖ్యలు వ్యక్తిగతమైనవి. అవి భారత ప్రభుత్వ అభిప్రాయాలు కానేకావు. ఆ వ్యక్తులపై సంబంధిత సంస్థ(భాజపా) ఇప్పటికే చర్యలు తీసుకుంది. ఓఐసీ జనరల్‌ సెక్రెటేరియట్‌ తప్పుదోవ పట్టించే వ్యాఖ్యలు చేయడం విచారకరం. స్వార్థ ప్రయోజనాల వల్లే విభజనపూరిత అజెండాను ప్రదర్శిస్తున్నారని స్పష్టమవుతోంది. ఓఐసీ జనరల్‌ సెక్రెటేరియట్‌ మతపరమైన విధానాలను పక్కనబెట్టి, అన్ని విశ్వాసాలను గౌరవించాలని కోరుకుంటున్నాం’ అని విదేశీ వ్యవహారాల శాఖ ప్రతినిధి అరిందమ్‌ బాగ్చి సోమవారం ఓ ప్రకటనలో పేర్కొన్నారు.
పాక్పై ఎదురుదాడి
వివాదంపై పాకిస్థాన్‌ నిరసన వ్యక్తం చేస్తూ ఇస్లామాబాద్‌లోని భారత దౌత్యవేత్తకు సమన్లు జారీ చేసింది. భాజపా నేతల వ్యాఖ్యలు ప్రపంచవ్యాప్తంగా ఉన్న ముస్లింల మనోభావాలను దెబ్బతీశాయని పేర్కొంది. దీనిపై భారత్ తీవ్రంగా స్పందించింది. ఎన్నో ఏళ్ల నుంచి మైనారిటీ హక్కులను కాలరాస్తున్న దేశం.. మరో దేశంలోని మైనారిటీల వ్యవహారాలపై మాట్లాడటం అసంబద్ధంగా ఉందని అరిందమ్‌ బాగ్చి దుయ్యబట్టారు. భారత్‌లో అన్ని మతాలకు గౌరవం లభిస్తుందని, పాకిస్థాన్‌లా మతోన్మాదులకు తాము స్మారకాలు కట్టడం లేదని దుయ్యబట్టారు. పాక్ ముందుగా.. తమ దేశంలోని పరిస్థితులపై దృష్టిసారించాలని హితవు పలికారు.
నుపుర్, నవీన్‌ను అరెస్టుచేయాలి: కాంగ్రెస్‌
అంతర్జాతీయ స్థాయిలో భారత పేరు ప్రతిష్ఠలను భాజపా నేతలు దిగజార్చుతున్నారని కాంగ్రెస్‌ పార్టీ మండిపడింది. వివాదాస్పద వ్యాఖ్యలు చేసిన నుపుర్ శర్మ, నవీన్‌ కుమార్‌ జిందాల్‌ను తక్షణమే అరెస్టు చేయాలని కోరింది. భాజపాలోని సంఘ వ్యతిరేక శక్తులు దేశాన్ని విద్వేష మంటల్లోకి నెట్టివేస్తున్నాయని ధ్వజమెత్తింది. కమలం పార్టీ తప్పిదాల కారణంగా దేశం క్షమాపణలు చెప్పాల్సిన పరిస్థితులు రావడం విచారకరమని కాంగ్రెస్‌ నేతలు రాహుల్‌ గాంధీ, పి.చిదంబరం తదితరులు పేర్కొన్నారు. వివాదాస్పద వ్యాఖ్యలు చేసిన సొంత పార్టీ నేతలపై విదేశాల ఒత్తిడి వల్లే భాజపా చర్యలు తీసుకుందని సీపీఎం, సీపీఐ పేర్కొన్నాయి. పార్టీ అప్పగించిన బాధ్యతలను నిర్వర్తిస్తూ మాట్లాడిన వ్యక్తులను భాజపాతో సంబంధంలేని వ్యక్తులుగా ఎలా పేర్కొంటారని వామపక్ష అగ్ర నేతలు సీతారాం ఏచూరి, డి.రాజా ప్రశ్నించారు. భాజపా మాజీ అధికార ప్రతినిధులపై చట్టపరమైన చర్యలు తీసుకోవాలని ఎంఐఎం, ఆలిండియా ముస్లిం పర్సనల్‌ లా బోర్డు డిమాండ్‌ చేశాయి.
ప్రాణాలకు ముప్పు: నుపుర్ శర్మ
భారతీయ జనతా పార్టీ నుంచి సస్పెండ్‌ అయిన ఆ పార్టీ మాజీ అధికార ప్రతినిధి నుపుర్ శర్మ తన ప్రాణాలకు ముప్పు ఉందని పోలీసులకు ఫిర్యాదు చేశారు. తనను హతమార్చుతామంటూ బెదిరింపులు వస్తున్నాయని తెలిపారు. దీంతో గుర్తు తెలియని వ్యక్తులపై ఐపీసీ సెక్షన్లు 153ఎ, 506, 507, 509 కింద ఎఫ్‌ఐఆర్‌ నమోదు చేసి దర్యాప్తు ప్రారంభించినట్లు దిల్లీలోని సీనియర్‌ పోలీసు అధికారి ఒకరు తెలిపారు. వివాదాస్పద వ్యాఖ్యలు చేశారనే ఆరోపణలు రావడం, కొన్ని ముస్లిం దేశాలు నిరసన తెలిపిన నేపథ్యంలో భాజపా జాతీయ అధికార ప్రతినిధి నుపుర్ శర్మ, ఆ పార్టీ దిల్లీ మీడియా విభాగ అధినేత నవీన్‌ కుమార్‌ జిందాల్‌ ఆదివారం భాజపా నుంచి సస్పెండ్‌కు గురైన విషయం తెలిసిందే.