నూతన సాగు చట్టాలకు వ్యతిరేకంగా దేశ రాజధాని దిల్లీలో రైతుల నిరసనలు 16వ రోజుకు చేరాయి. కేంద్రం దిగొచ్చి చట్టాలను ఉపసంహరించుకోవాలని డిమాండ్ చేస్తున్నారు కర్షకులు. అయితే చర్చలకు సిద్ధంగా ఉన్నామని చెబుతున్న ప్రభుత్వం.. చట్టాలను మాత్రం వెనక్కి తీసుకునే ప్రసక్తే లేదని మరోమారు తేల్చిచెప్పింది. ఈ నేపథ్యంలో రానున్న రోజుల్లో ఆందోళనను ఉద్ధృతం చేసేందుకు ప్రణాళికలు రచిస్తున్నారు అన్నదాతలు.
కరోనా కల్లోలం...
రైతులు నిరసనలు చేపట్టిన టిక్రి, సింఘు, ఘాజిపూర్, నోయిడా సరిహద్దు ప్రాంతాల్లో బలగాలను భారీగా మోహరించింది కేంద్రం. అయితే సింఘు సరిహద్దులో కరోనా కలకలం సృష్టించింది. ఆ ప్రాంతంలో మోహరించిన పోలీసు సిబ్బందిలో ఇద్దరికి కరోనా పాజిటివ్గా తేలింది.
ఎన్ని అడ్డంకులు వచ్చినా తాము మాత్రం వెనక్కి తగ్గేది లేదని రోడ్ల మీద బైఠాయించి నిరసనలు తెలుపుతున్నారు అన్నదాతలు. ఆందోళనల్లో భాగంగా శనివారం దిల్లీ-జైపుర్, దిల్లీ-ఆగ్రా రహదారులను దిగ్బంధిస్తామని వెల్లడించారు. టోల్ గేట్ల వద్ద రుసుము కట్టకుండా నిరసన తెలపాలని యావత్ దేశానికి పిలుపునిచ్చారు. త్వరలో రైల్వే ట్రాక్లు ముట్టిడిస్తామని స్పష్టం చేశారు.