బిహార్ ముఖ్యమంత్రి, జేడీ(యూ) నేత నీతీశ్ కుమార్‌పై ఎన్నికల వ్యూహకర్త ప్రశాంత్‌ కిశోర్ తన విమర్శల పర్వాన్ని కొనసాగిస్తున్నారు. ఇటీవల భాజపాతో పొత్తుకు ముగింపు పలికినా.. ఇంకా ఆ పార్టీతో బంధాన్ని కొనసాగిస్తున్నారని వ్యాఖ్యలు చేస్తున్నారు. ఇలా అన్నిసార్లు రెండు మార్గాలు సాధ్యం కాదన్నారు. 'నీతీశ్ కుమార్‌జీ భాజపా/ఎన్డీఏతో మీకు ఎలాంటి సంబంధం లేకపోతే.. మీ ఎంపీని రాజ్యసభ డిప్యూటీ ఛైర్మన్ పదవిని వీడమని చెప్పండి. మీకు అన్నివేళలా రెండు అవకాశాలు ఉండవు' అని తాజాగా పీకే ట్వీట్ చేశారు.
భాజపాతో నీతీశ్ టచ్‌లోనే ఉన్నారని.. పరిస్థితులు డిమాండ్‌ చేస్తే కాషాయ పార్టీతో మళ్లీ పొత్తు పెట్టుకుంటారని రెండురోజుల క్రితం పీకే వ్యాఖ్యానించిన సంగతి తెలిసిందే. 'భాజపాకు వ్యతిరేకంగా జాతీయ స్థాయిలో కూటమిని ఏర్పాటు చేసేందుకు నీతీశ్ కుమార్ ప్రయత్నాలు చేస్తున్నారని ప్రజలు అనుకుంటున్నారు. కానీ, ఆయన భాజపాతో టచ్‌లో ఉన్నారని తెలిస్తే ఆశ్చర్యపోతారు'. అని పీకే వ్యాఖ్యానించారు.
'ఆ పార్టీ ఎంపీ, రాజ్యసభ డిప్యూటీ ఛైర్మన్ హరివంశ్‌ నారాయణ్‌ సింగ్‌ సహాయంతో నీతీశ్ భాజపాతో టచ్‌లోనే ఉన్నారు. అందుకే భాజపాతో తెగతెంపులు చేసుకున్నప్పటికీ హరివంశ్‌ను రాజ్యసభ డిప్యూటీ ఛైర్మన్ సభ్యత్వానికి రాజీనామా చేయమని కోరలేదు. ఆయన ద్వారా అవసరమైనప్పుడు భాజపాతో కలిసి పనిచేస్తారు. ఈ విషయాన్ని గుర్తుంచుకోండి.' అని బిహార్‌లో పాదయాత్ర కొనసాగిస్తోన్న ప్రశాంత్‌ కిశోర్ విమర్శించారు.