పెగాసస్ గూఢచర్యం వ్యవహారంపై ప్రత్యేక దర్యాప్తు బృందంతో (సిట్) కోర్టు పర్యవేక్షణలో దర్యాప్తు జరిపించాలని సుప్రీంకోర్టులో ఓ పిటిషన్ దాఖలైంది. పాత్రికేయులు, కార్యకర్తలు, రాజకీయ నాయకులు, ఇతరులపై ఈ స్పైవేర్ సాయంతో ప్రభుత్వ సంస్థలు నిఘా పెట్టాయనే ఆరోపణలు దేశవ్యాప్తంగా దుమారం రేపుతున్న నేపథ్యంలో న్యాయవాది ఎంఎల్ శర్మ ఈ వ్యాజ్యం దాఖలు చేశారు.
పెగాసస్ కుంభకోణం తీవ్ర ఆందోళనకరమని శర్మ అన్నారు. అది భారత ప్రజాస్వామ్యం, న్యాయవ్యవస్థ, దేశ భద్రతపై జరిగిన ముప్పేట దాడేనని పిటిషన్లో ఆయన పేర్కొన్నారు. విస్తృత, బాధ్యతారాహిత్యమైన నిఘా అనైతికమని చెప్పారు.