పాకిస్థాన్ సైన్యం కాల్పుల విరమణ ఒప్పందాన్ని మరోసారి ఉల్లంఘించింది. జమ్ము కశ్మీర్ రాజౌరీ జిల్లాలోని అంతర్జాతీయ సరిహద్దు వెంబడి గ్రామాలు, ఫార్వార్డ్ పోస్టుల లక్ష్యంగా కాల్పులకు తెగబడింది.
అయితే పాక్ కాల్పులను భారత సైన్యం దీటుగా తిప్పికొట్టిందని అధికారులు తెలిపారు. ఈ ఘటనలో ఎలాంటి ప్రాణనష్టం జరగలేదని చెప్పారు.
"ఆదివారం ఉదయం 11.15 గంటలకు పాకిస్థాన్ సైన్యం కాల్పుల విరమణ ఒప్పందాన్ని ఉల్లంఘిస్తూ.. చిన్న ఆయుధాలు, మోర్టార్ షెల్లింగులతో దాడి చేసింది. రాజౌరీ జిల్లా నౌషీరా సెక్టార్లోని అంతర్జాతీయ సరిహద్దు వెంబడి కాల్పులు ప్రారంభించింది. దీనికి భారత సైన్యం గట్టిగా బదులిచ్చింది."
-భారత సైన్యం ప్రతినిధి
శనివారం రాత్రి కూడా సరిహద్దులో కాల్పులు జరిగినట్లు సైన్యం తెలిపింది. సత్పాల్, మన్యారీ, కరోల్ కృష్ణ, గుర్నమ్ ప్రాంతాలను లక్ష్యంగా చేసుకొని పాక్ సైన్యం దాడి చేసినట్లు పేర్కొంది. శనివారం రాత్రి 9 గంటలకు ప్రారంభమైన ఈ కాల్పులు.. తెల్లవారుజామున 3.45 గంటల వరకు కొనసాగినట్లు వెల్లడించింది. భారత్వైపు మాత్రం ఎలాంటి నష్టం జరగలేదని స్పష్టం చేసింది.
జమ్ము కశ్మీర్లో ఈ ఏడాది 4 వేల సార్లు కాల్పుల విరమణ ఒప్పందాన్ని ఉల్లంఘించింది పాకిస్థాన్. గత పదేళ్లలో ఇదే అత్యధికం. 2019లో ఈ సమయానికి 3,289 సార్లు కాల్పుల విరమణ ఉల్లంఘనలు జరిగాయి.
ఇదీ చదవండి-భద్రతా బలగాల అదుపులో ఉగ్రవాది
