అఫ్గాన్​లో చిక్కుకున్న భారతీయుల పరిస్థితి ఏంటి?

అఫ్గానిస్థాన్​లో భారత్​కు చెందిన 200 మంది చిక్కుకున్నట్లు విశ్వసనీయవర్గాలు తెలిపాయి. అయితే వీరిని వెనక్కి తీసుకొచ్చేందుకు ప్రయత్నిస్తున్నట్టు భారత విదేశాంగశాఖ వెల్లడించింది. పరిస్థితులను పర్యవేక్షిస్తున్నట్టు స్పష్టం చేసింది.

తాలిబన్ల ఆక్రమణతో ఆందోళనకరంగా మారిన అఫ్గాన్​ పరిస్థితులను.. భారత అత్యున్నతస్థాయి రక్షణాధికారులు సమీక్షిస్తున్నట్టు తెలుస్తోంది. అఫ్గాన్​లో చిక్కుకున్న భారత రాయబార కార్యాలయం సిబ్బంది, భద్రతా సిబ్బందితో పాటు దాదాపు 200మంది భారతీయులను త్వరితగతిన వెనక్కి తీసుకురావడమే ప్రస్తుతమున్న లక్ష్యంగా వారు భావిస్తున్నట్టు సమాచారం.

మరోవైపు కాబుల్​ అంతర్జాతీయ విమానాశ్రయంలో నెలకొన్న గందరగోళం ఆందోళనలు కలిగిస్తోంది. దేశాన్ని వీడేందుకు ప్రజలు భారీస్థాయిలో విమానాశ్రయానికి తరలివెళుతున్నారు. పరిస్థితులు క్షణక్షణానికి దారుణంగా మారుతున్న నేపథ్యంలో కాబుల్​లోని భారత రాయబార కార్యాలయం నుంచి సిబ్బందిని విమానాశ్రయానికి తీసుకురావడం కూడా కష్టంగా మారింది. ఈ పరిస్థితుల వల్లే.. భారత్​ నుంచి విమానాలు పంపించడంలో జాప్యం ఏర్పడుతోందని సంబంధిత వర్గాలు వెల్లడించాయి. ఏ క్షణంలోనైనే ఎగిరేందుకు సీ-17 గ్లోబ్​మాస్టర్​ వంటి భారీస్థాయి ఎయిర్​క్రాఫ్ట్​లు సిద్ధంగా ఉన్నట్టు సమాచారం.

విమానాశ్రయంలో గందరగోళం కారణంగా కాబుల్​కు వెళ్లాల్సి వాణిజ్య విమానం కూడా రద్దు అయినట్టు సంబంధిత వర్గాలు స్పష్టం చేశాయి.

ఈ క్రమంలో భారత విదేశాంగశాఖ ఓ ప్రకటనను విడుదల చేసింది.

"పరిస్థితులను ఎప్పటికప్పుడు పర్యవేక్షిస్తున్నాము. అఫ్గాన్​లో భారతీయుల భద్రతకు అన్నివిధాలుగా కృషిచేస్తాము. అఫ్గాన్​లోని సిక్కులు, హిందు సంఘాలతో ఎప్పటికప్పుడు సంప్రదింపులు జరుపుతున్నాము. అత్యవసర పరిస్థితుల్లో మాట్లాడేందుకు వీలుగా కొన్ని ఫోన్​ నెంబర్లు పంపించాము. అఫ్గాన్​ను వీడి దేశానికి వచ్చేయాలి అని అనుకుంటున్న వారిని తరలించే ప్రయత్నంలో ఉన్నాము. భద్రతకు సంబంధించి సమయానుగుణంగా ఆదేశాలు జారీచేస్తాము."

-- భారత విదేశాంగశాఖ.

'చర్యలు చేపట్టాలి...'

అఫ్గానిస్థాన్​ను తాలిబన్లు స్వాధీనం చేసుకున్న నేపథ్యంలో పొరుగు దేశాలతో భారతీయ విదేశాంగ విధానాన్ని సమీక్షించాల్సిన అవసరం ఉందని ఎన్​సీపీ అధినేత శరత్​ పవార్​ అభిప్రాయపడ్డారు. దీర్ఘకాల అవసరాల దృష్ట్యా భారత్​ అప్రమత్తంగా వ్యవహరించి తగిన జాగ్రత్తలు తీసుకోవాల్సిన అవసరం ఉందన్నారు. అంతేగాకుండా పాకిస్థాన్​, చైనాలతో తప్ప పొరుగున ఉన్న ఇతర దేశాలతో మనకు సత్​సంబంధాలు ఉన్నాయని పేర్కొన్నారు. ఈ క్రమంలో.. అఫ్గాన్​ వ్యవహారంపై ప్రభుత్వం ఎలాంటి నిర్ణయం తీసుకున్నా మద్దతిస్తామని స్పష్టం చేశారు పవార్​.

'వారిని వెంటనే భారత్​కు రప్పించాలి..'

అఫ్గానిస్థాన్​లోని గురుద్వార్​లో చిక్కుకున్న 200 మంది సిక్కులతో సహా భారతీయులందరినీ మన దేశానికి తరలించే ఏర్పాటు చేయాలని పంజాబ్ ముఖ్యమంత్రి అమరీందర్ సింగ్​ కేంద్రానికి విజ్ఞప్తి చేశారు. ఇందుకుగానూ తమ ప్రభుత్వం ఎటువంటి సాయం చేయడానికైనా సిద్ధంగా ఉందని తెలిపారు. ఈ మేరకు ట్వీట్​ చేశారు.

ఇవీ చూడండి: