పార్లమెంట్ అత్యవసర భేటీకి విపక్షాల డిమాండ్

దేశంలో కరోనా విజృంభణ నేపథ్యంలో తక్షణమే పార్లమెంట్​ అత్యవసర సమావేశాలను ఏర్పాటు చేసేందుకు ఆదేశించాలని రాష్ట్రపతి రామ్​నాథ్​ కోవింద్​ను కోరాయి​ ప్రతిపక్షాలు. కనీసం రెండు రోజులపాటు సమావేశాలు నిర్వహించి ప్రస్తుత పరిస్థితిని అధిగమించేందుకు కార్యాచరణ రూపొందించాలని సూచించాయి.

దేశంలో కరోనా కేసులు రికార్డు స్థాయిలో పెరుగుతున్నందున.. తక్షణమే పార్లమెంట్​ అత్యవసర సమావేశాల ఏర్పాటుకు ఆదేశించాలని రాష్ట్రపతి రామ్​నాథ్ కోవింద్​ను ప్రతిపక్షాలు కోరాయి. కనీసం రెండు రోజులపాటు సమావేశాలు నిర్వహించాలని విజ్ఞప్తి చేశాయి.

మనీష్​ తివారీ ట్వీట్

"ప్రస్తుతం మనం ఎన్నడూలేని సంక్షోభాన్ని ఎదుర్కొంటున్నాం. ఆసుపత్రుల్లో పడకలు, ఆక్సిజన్, టీకాలు అందుబాటులో లేవు.​ భాజపాకు చెందిన నీరోలు బంగాల్ రాజకీయంలో మునిగిపోయారు. తక్షణమే రెండు రోజుల అత్వవసర పార్లమెంటరీ సమావేశాన్ని నిర్వహించాల్సిందిగా నేను రాష్ట్రపతిని కోరుతున్నాను. "

-మనీశ్ తివారీ, కాంగ్రెస్​ ఎంపీ

శివసేన ఎంపీ సంజయ్​ రౌత్​ సైతం.. దేశంలో కరోనా వ్యాప్తి దృష్ట్యా వెంటనే పార్లమెంటరీ సమావేశాన్ని ఏర్పాటు చేయాలని ట్విట్టర్​ ద్వారా సూచించారు.

సంజయ్ రౌత్​ ట్వీట్​

"ప్రస్తుతం దేశంలో యుద్ధ వాతావరణం నెలకొంది. పడకలు, ఆక్సిజన్ కొరత తీవ్రంగా ఉంది. రెండు రోజులపాటు ప్రత్యేక పార్లమెంటరీ సమావేశం ఏర్పాటు చేయాలి."

-సంజయ్​ రౌత్, ​ శివసేన ఎంపీ

దిల్లీలో కరోనా విలయం కారణంగా సోమవారం రాత్రి నుంచి వారం రోజులపాటు కర్ఫ్యూను విధిస్తున్నట్లు దిల్లీ ప్రభుత్వం ప్రకటించింది. దిల్లీలో పాజిటివిటి రేటు 30 శాతానికి చేరువైంది.

ఇదీ చదవండి :అదనపు టీకాల కోసం మోదీకి దీదీ విజ్ఞప్తి