Yogi Adityanath: 'విపక్షాల పోటీ రెండో స్థానం కోసమే'

Yogi Adityanath: ఉత్తర్​ప్రదేశ్​ ఎన్నికల్లో తాము ఎవరితోనూ పోటీపడటం లేదని అన్నారు ఆ రాష్ట్ర సీఎం యోగి ఆదిత్యనాథ్​. విపక్షాలు ద్వితీయ స్థానం కోసమే పోటీ పడుతున్నాయని పేర్కొన్నారు. ఉగ్రవాదులంటే సమాజ్​వాదీకి సానుభూతి అని ఆరోపించారు. ఆ పార్టీలో కించిత్తు మార్పు లేదని అన్నారు.

Yogi Adityanath: భాజపాను లక్ష్యంగా చేసుకొని లఖింపుర్​ ఖేరి ఘటన (రైతులపైకి వాహనం నడపటం)ను జలియన్​వాలబాగ్​ దురాగతంతో పోల్చుతూ విపక్షాలు చేస్తున్న ప్రచారంపై ఉత్తర్​ప్రదేశ్​ ముఖ్యమంత్రి యోగి ఆదిత్యనాథ్​ స్పందించారు. చట్టం తన పని తాను చేసుకుపోతుందన్నారు. ఈ సంఘటనతో రాష్ట్ర ప్రభుత్వానికి ఎలాంటి సంబంధం లేదన్నారు. దీని నుంచి రాజకీయ ప్రయోజనం పొందాలని చూస్తున్న విపక్షాల ప్రయత్నం మాత్రం ఫలించదని చెప్పారు. ఎన్నికల ప్రచారంలో భాగంగా హెలికాప్టర్​లో వెళుతూ ఆదివారం ఓ వార్తా సంస్థతో యోగి మాట్లాడారు.

గాలి కొత్తదే.. ఎస్పీ మాత్రం అదే..

"రాష్ట్రంలో ఇతర పార్టీలన్నీ కేవలం ద్వితీయ స్థానం కోసమే పోటీ పడుతున్నాయి. తనేను పోటీలో ఉన్న గోరఖ్​పుర్​ పట్టణ నియోజకవర్గ ఫలితం గురించి ఎటువంటి ఆందోళన లేదు." అని యోగి అన్నారు. 'నయూ (కొత్త) ఎస్పీ'గా తాము రూపాంతరం చెందామని సమాజ్​వాదదీ పార్టీ చేసుకొంటున్న ప్రచారం గురించి అడగ్గా.. ఆదిత్యనాథ్​ నవ్వుతూ సమాధానం ఇచ్చారు. "ఈ ఎన్నికల్లోనూ నేరగాళ్లకు, మాఫఇయాకు, ఉగ్రవాదుల సహాయకులకు ఆ పార్టీ టికెట్లు ఇచ్చింది. కించిత్తు కూడా మారలేదని స్పష్టంగా తెలియడం లేదూ!" అన్నారు. 'నయూ హవా హై, పర్​ వహీ ఎస్పీ హై' (గాలి కొత్తదే.. ఎస్పీ మాత్రం అదే) అని యోగి వర్ణించారు.

ప్రధాని పదవిపై ఆశలున్నాయా?

నేరగాళ్లు తమకు ఓటు వేయవద్దని అఖిలేశ్​ బహిరంగ సభల్లో చెప్పారు కదా? అని అడిగినప్పుడు.. "పాత పాలన మళ్లీ వచ్చేందుకు నేరగాళ్లంతా ఒక్కటై ఓట్లు వేయాలని ఇచ్చిన పిలుపది. వ్యతిరేకార్థంలో తీసుకోవాలి"అని ఎద్దేవా చేశారు. దేశంలో 'హిందుత్వ' ప్రతినిధిగా ప్రచారంలో ఉన్న మీకు ప్రధాని పదవిపై ఆశలున్నాయా? అన్న ప్రశ్నకు స్పందిస్తూ.. "పార్టీ ఇచ్చిన పని చేసుకుపోతున్నా. పదవుల కోసం నేనెప్పుడూ తాపత్రయపడలేదు" అని యోగి బదులిచ్చారు.

'మమత, పవార్​లకు యూపీలో పట్టు లేదు..'

భాజపా ఓటమే లక్ష్యంగా ఉత్తర్​ప్రదేశ్​లో ప్రతిపక్షాలకు మద్దతుగా నిలుస్తున్న తృణమూల్ కాంగ్రెస్ అధినేత్రి మమతా బెనర్జీ, ఎన్​సీపీ అధినేత శరద్​ పవార్​, ఆర్జేడీ నేతలకు యూపీ జనంలో పట్టు లేదని యోగి తెలిపారు. 'ఈ ఎన్నికల్లో మీకు ప్రధాన ప్రత్యర్థి ఎవరు?' అని ప్రశ్నించగా.. "ఎవరితోనూ మేము పోటీ పడటం లేదు. వాళ్లలో వాళ్లు ద్వితీయ స్థానం కోసం పోటీపడుతున్నారు. 80శాతం ఓటర్లు మావైపే" అని వ్యాఖ్యానించారు.

'ఉగ్రవాదులంటే సమాజ్​వాదీకి సానుభూతి..'

ఉగ్రవాదులంటే సమాజ్​వాదీ పార్టీకి సానుభఊతి అనీ, అహ్మదాబాద్ బాంబు పేలుళ్ల కేసు ముద్దాయిల్లో ఒకరి తండ్రికి ఆ పార్టీతో సంబంధాలున్నాయని యోగి ఆరోపించారు. ఆదివారం లఖింపుర్​ ఖేరిలో ఎన్నికల ప్రచార సభలో ఆయన ప్రసంగించారు. జాతీయ భద్రతతో ఆటాడుకునే ఉగ్రవాదులకు మద్దతు ఇచ్చే సమాజ్​వాదీ పార్టీకి ప్రజలెలా మద్దతు ఇవ్వగలరని సీఎం ప్రశ్నించారు. రాష్ట్రంలో అల్లర్లు లేకుండా చూసేందుకు భాజపాను గెలిపించాలని కోరారు. కొవిడ్ 19 టీకా పైనా అఖిలేశ్​ తప్పుడు ప్రచారం చేశారనీ, ప్రజలు కరోనా కష్టాల్లో ఉన్నప్పుడు సాయపడింది భాజపా నేతలు, కార్యకర్తలేనని చెప్పారు.

ఇదీ చూడండి:యూపీ మూడో దశ పోలింగ్​ ప్రశాంతం.. ఓటింగ్​ శాతం ఎంతంటే?