వృద్ధాప్యంతో, అనారోగ్యంతో ఉన్న శునకాలు, పిల్లులు వంటి పెంపుడు జంతువులను కొందరు వీధుల్లో వదిలేస్తుంటారు. దీంతో ఒక్కసారిగా వాటి బతుకు దుర్భరంగా మారిపోతుంది. తిండి లేక, ఆరోగ్యం కుదుటపడక అవి నానాటికీ బక్కచిక్కిపోతుంటాయి. తన కంట పడిన అలాంటి జంతువులకు.. అన్నీ తానై చూసుకుంటున్నారు నిధి తివారీ.
ఛత్తీస్గఢ్ బిలాస్పుర్కు చెందిన నిధి తివారీకి జంతువులంటే ఎనలేని ప్రేమ. సరైన ఆహారం లేక తీవ్ర అవస్థలు పడుతున్న మూగజీవాలను చూసి చలించిన నిధి.. వాటిని సాకేందుకు ఏకంగా మూడు అంతస్తుల భవనాన్ని కేటాయించారు. వాటికి చక్కటి వైద్యం అందించి, ఆహారం అందిస్తున్నారు. పోలీసులు, అటవీ అధికారులు, ప్రజలు ఇలాంటి జీవాలను చూసి తనకు సమాచారం ఇస్తుంటారని ఆమె తెలిపారు. ఓసారి గుడిలో బలి ఇవ్వడానికి తీసుకెళ్తున్న మేకను రక్షించేందుకు కేంద్ర మాజీ మంత్రి మేనకా గాంధీ తనకు సాయం చేసినట్టు చెప్పారు నిధి.
"ఓ ఆలయంలో చిన్న మేకపిల్లను బలి ఇస్తున్నారని తెలిసింది. నేను వెంటనే వెళ్లేసరికి బలి ఇవ్వడానికి పూర్తిగా సిద్ధం చేశారు. ఆ మేక భయంతో అరుస్తోంది. నన్ను రక్షించండి అన్నట్టుగా ఆ ఆరుపులు నాకు వినిపించాయి. ఒక జీవి ప్రాణం తీసి చేసే పూజతో ఏ దేవుడు సంతోషిస్తాడు? బలిని అడ్డుకున్నాను. నిర్వహకులపై ఫిర్యాదు చేసి ఆ మేకను తీసుకువచ్చాను."