ఫారిన్​ నుంచి గిఫ్ట్ పేరుతో టీచర్​కు టోకరా.. ఆశతో రూ.కోటిన్నర అప్పు చేసి మరీ ఇస్తే..

సర్​ప్రైజ్​ గిఫ్ట్​ అని ఓ ఉపాధ్యాయుడికి కొందరు దుండగులు కుచ్చుటోపీ పెట్టారు. పార్సిల్​ వచ్చిందని చెప్పి.. దాదాపు రూ. 1.85 కోట్లు వసూలు చేశారు. ఇందుకోసం బాధితుడు వివిధ బ్యాంకుల్లో రు. 1.5 కోట్లు అప్పు చేశాడు. అనంతరం తేరుకుని ప్రశ్నించగా.. కేటుగాళ్లు చేతులెత్తేశారు.

ఆశ.. ఓ ఉపాధ్యాయుడిని అప్పుల పాలు చేసింది. పరిచయం లేని వ్యక్తి నుంచి సర్​ప్రైజ్​ గిఫ్ట్ పార్సిల్​​ వచ్చిందనే సంతోషంతో.. కేటుగాళ్ల వలలో చిక్కున్నాడు. ఆ పార్సిల్​ తీసుకోవడం కోసం.. క్రమంగా దాదాపు రూ. 1.85 కోట్లు ఇచ్చాడు. తాను దాచుకున్న డబ్బులతో కలిపి.. రూ. 1.5 కోట్లు వివిధ బ్యాంకుల్లో అప్పుచేసి మరీ మోసగాళ్లకు ముట్టజెప్పాడు. చివరకు తేరుకుని.. పోలీసులను ఆశ్రయించాడు. ఈ ఘటన ఉత్తర్​ప్రదేశ్​లో జరిగింది.

నవీన్​ శామ్యూల్​​ సింగ్(53) లఖ్​నవూ త్రివేణి నగర్​లోని మాదేయ్​గంజ్​లో నివాసం ఉంటున్నాడు. టీచర్​గా పనిచేస్తున్నాడు. ఆగస్టు 4న నవీన్​కు ఓ కాల్​ వచ్చింది. అందులో మాట్లాడిన వ్యక్తి.. తనను ముంబయి కంపెనీ విల్టన్​ ఎక్స్​ప్రెస్​ లాజిస్టిక్స్​ డైరెక్టర్ జాన్​ స్పెన్సర్​గా నవీన్​కు పరిచయం చేసుకున్నాడు. అతడు పోలాండ్​కు చెందిన వ్యక్తి అని చెప్పాడు. ఆపై నవీన్​కు పోలాండ్​ నుంచి ఓ పార్సిల్​ వచ్చినట్లు.. అందులో ​రికో బ్రాండ్​ వాచ్​, నెక్లెస్​, బ్రేస్​లెట్​, ఒక జీ13 మొబైల్​ ఫోన్​, యాపిల్​ నోట్​ ప్యాడ్​, ఓ పర్ఫ్యూమ్​ బాటిల్, ఓ టీ షర్ట్ ఉన్నట్లు తెలిపాడు.

మీలో మాకు నచ్చింది అదే..
పార్సిల్​ తీసుకునేందుకు రూ. 38 వేలు చెల్లించాలని తెలిపాడు జాన్. దీంతో కాస్త అనుమానం వచ్చి ఆ పార్సిల్​ పంపించిన ఫెలిక్స్​ వార్సా అనే మరో వ్యక్తికి ఫోన్​ చేశాడు నవీన్. తనకు పోలాండ్​లో తెలిసిన వాళ్లు ఎవరూ లేరని.. తనకెందుకు పార్సిల్ పంపిస్తున్నారని వార్సాను అడిగాడు. క్రిస్టియానిటీ గురించి మీరు చేసిన కొన్ని వీడియోలు చూశానని.. అందుకే పార్సిల్​ పంపించినట్లు వార్సా బదులిచ్చాడు. దీంతో అతడు చెప్పింది నిజమేనని నమ్మి.. జాన్ స్పెన్సర్​కు రూ. 38 వేలు పంపించాడు నవీన్​ శామ్యూల్​.

రూ. 1.85 కోట్లు వసూల్​..
మొదటి పేమెంట్ అయిపోయాక.. పార్సిల్​లో ఉన్న వస్తువులకు జీఎస్​టీ కట్టడం కోసం రూ.1.69 లక్షలు ఇవ్వాలని, యాంటీ మనీ లాండరింగ్​ కోసం.. రూ.3.22 లక్షలు కట్టాలని, స్కానింగ్​ చేసేటప్పుడు పార్సిల్​లో ఉన్న 5 వేల పౌండ్ల నగదుకు రూ.13,87,500 చెల్లించాలని జాన్​ స్పెన్సర్​ నవీన్​కు చెప్పాడు. దీంతో నవీన్​ ఆ మొత్తం అంతా చెల్లించాడు. ఇలా ఏదో పేరుతో తరచూ ఫోన్​ చేసి నవీన్​ను డబ్బులు చెల్లించాలని అడిగేవాడు జాన్. అలా క్రమంగా.. రూ. 1,85,62,887 చెల్లించాడు నవీన్​.

మూడు బ్యాంకుల్లో రూ. 1.5 కోట్ల లోన్​..
ఈ చెల్లింపుల కోసం మూడు బ్యాంకుల వద్ద నవీన్​ దాదాపు రూ.1.5 కోట్ల లోన్​ తీసుకున్నాడు. తన ఖర్చులు పోను.. నవీన్​ వద్ద ఏమీ మిగలకపోగా.. ఇక చెల్లింపులు చేయలేనని.. ఈ వ్యవహారం ఇంతటితో ముగించమని.. జాన్​ స్పెన్సర్​ను అడిగాడు. దీంతో మళ్లీ రూ.4.5 లక్షలు నవీన్​ను డిమాండ్​ చేశాడు జాన్. ఆ డబ్బులు ఇవ్వడానికి నిరాకరించిన నవీన్ శామ్యూల్​​.. తనకు జరిగిన మోసం గురించి పోలీసులను ఆశ్రయించాడు. ఈ ఘటనపై కేసు నమోదు చేసిన పోలీసులు.. సైబర్​ సెల్​ సహాయంతో నిందితుల కోసం గాలిస్తున్నారు.

ఇవీ చదవండి :ఒకే రోజు ముగ్గురు అనుమానాస్పద మృతి.. కల్తీ మద్యమే కారణమా ??