Margadarshi Chit Case: ఆంధ్రప్రదేశ్‌లో చిట్ గ్రూప్‌ల నిలిపివేతకు సంబంధించి.. మార్గదర్శి చిట్ఫండ్ సంస్థ దాఖలు చేసిన వ్యాజ్యాలపై హైకోర్టులో వాదనలు పూర్తయ్యాయి. మధ్యంతర ఉత్తర్వులపై న్యాయమూర్తి నిర్ణయాన్ని వాయిదా వేశారు. ఆంధ్రప్రదేశ్‌లో చిట్స్‌ రిజిస్ట్రార్ లేదా డిప్యూటీ రిజిస్ట్రార్.. జులై 30న ఇచ్చిన బహిరంగ నోటీసును సవాలు చేస్తూ.. మార్గదర్శి చిట్ఫండ్ సంస్థ దాఖలు చేసిన వ్యాజ్యాలపై బుధవారం హైకోర్టులో.. వాదనలు జరిగాయి. గుంటూరు, కృష్ణా జిల్లాల చిట్ గ్రూపుల విషయమై దాఖలైన రెండు వ్యాజ్యాల్లో అనుబంధ పిటిషన్లపై వాదనలు ముగిశాయి. మధ్యంతర ఉత్తర్వులు ఇచ్చే వ్యవహారంపై తీర్పును వాయిదా వేస్తున్నట్లు.. న్యాయమూర్తి ప్రకటించారు.
Maragadarshi Chit Case: మార్గదర్శి వ్యాజ్యాలపై విచారణ బుధవారానికి వాయిదా..
ప్రకాశం జిల్లా చిట్ గ్రూపులపై దాఖలైన మరో వ్యాజ్యంపై.. విచారణను ఇవాల్టికి వాయిదా వేశారు. ఈ పిటిషన్‌లో తగిన ఉత్తర్వులు ఇస్తామని.. మౌఖికంగా పేర్కొన్నారు. బుధవారం జరిగిన విచారణలో.. ప్రభుత్వం తరఫున అడ్వకేట్‌ జనరల్‌ శ్రీరామ్‌ వాదనలు వినిపించారు. చిట్ గ్రూపుల నిలిపివేతకు.. ఏకపక్షంగా నిర్ణయం తీసుకోలేదన్న ఆయన.. ఉల్లంఘనలు కొనసాగుతున్నందున.. అభ్యంతరాలను ఆహ్వానిస్తూ బహిరంగ నోటీసిచ్చామన్నారు.
సుమోటోగా చర్యలు ప్రారంభించే అధికారం చిట్ రిజిస్ట్రార్లకు ఉందని తెలిపారు. ఫిర్యాదు కోసం.. వేచి చూడాల్సిన అవసరం లేదని, 2008లో జారీ చేసిన జీవో ప్రకారం.. అసిస్టెంట్‌, డిప్యూటీ రిజిస్ట్రార్లకు అధికారాలను కేటాయించారని తెలిపారు. ప్రకాశం జిల్లా పిటిషన్ విషయంలో.. చిట్ గ్రూపుల నిలుపుదలకు ముందుగా ఉత్తర్వులిచ్చి, తర్వాత అభ్యంతరాలను ఆహ్వానిస్తూ నోటీసిచ్చిన నేపథ్యంలో వాటిని ఉపసంహరించుకొంటామని చెప్పారు.