లఖింపుర్‌ ఘటనపై యోగి సర్కార్​కు సుప్రీం ప్రశ్నలు

లఖింపుర్‌ ఖేరి ఘటనలో అసలు నిందితులు ఎవరు? ఎవరిపై కేసు నమోదు చేశారు? ఎవరిని అరెస్టు చేశారు? అనే వివరాల తెలపాలని ఉత్తర్​ప్రదేశ్​ సర్కారును సుప్రీంకోర్టు ఆదేశించింది. ఈ మేరకు లఖింపుర్‌ ఘటనపై చేపట్టిన దర్యాప్తుపై స్టేటస్‌ రిపోర్టు సమర్పించాలని ఆదేశించింది.

లఖింపుర్‌ ఖేరి ఘటనపై చేపట్టిన దర్యాప్తుపై స్టేటస్‌ రిపోర్టు సమర్పించాలని ఉత్తరప్రదేశ్‌ ప్రభుత్వాన్ని ఆదేశించింది సుప్రీంకోర్టు. లఖింపుర్​ ఘటనలో మరణించిన లవ్ ప్రీత్ సింగ్ తల్లికి వెంటనే ఉన్నతస్థాయి వైద్యం అందించాలని స్పష్టంచేసింది. ఈ మేరకు రాష్ట్ర ప్రభుత్వానికి తగిన సూచనలు ఇవ్వాలని యూపీ అదనపు అడ్వకేట్​ జనరల్‌ గరిమాప్రసాద్‌ను ఆదేశించింది.

లఖింపుర్‌ ఘటనపై ఉత్తరప్రదేశ్‌కు చెందిన న్యాయవాదులు రాసిన లేఖపై ప్రధాన న్యాయమూర్తి జస్టిస్‌ ఎన్​వీ రమణ, జస్టిస్ సూర్యకాంత్, జస్టిస్ హిమ కోహ్లీతో కూడిన ధర్మాసనం విచారణ చేపట్టింది. ఈ విచారణలో ఘటనకు కారకులైన అందరిపై ఎఫ్​ఐఆర్​ నమోదు చేసి, శిక్షించాలని పిటిషనర్ల తరపు న్యాయవాది శివకుమార్ త్రిపాఠి విజ్ఞప్తి చేశారు.

అనంతరం వాదనలు వినిపించిన యూపీ అదనపు అడ్వకేట్‌ జనరల్‌.. ఘటన చాలా దురదృష్టకరమైనది, కేసు విచారణకు జ్యూడిషియల్ కమిషన్ ఏర్పాటు చేసినట్లు తెలిపారు. ఈ దశలో జోక్యం చేసుకున్న ధర్మాసనం.. లఖింపుర్‌ ఘటనలో అసలు నిందితులు ఎవరు? ఎవరిపై కేసు నమోదు చేశారు? ఎవరిని అరెస్టు చేశారు? అనే వివరాలతో.. స్టేటస్ రిపోర్టు ఇవ్వాలని ఆదేశించింది. తదుపరి విచారణ శుక్రవారానికి వాయిదా వేసింది.

ఇదీ చూడండి:యడియూరప్ప సన్నిహితుడి ఇంట్లో ఐటీ సోదాలు