India Woman Going Pakistan : పబ్జీ ఆన్‌లైన్‌ గేమ్‌లో పరిచయమైన యువకుడి కోసం తన నలుగురు పిల్లలతో కలసి భారత్‌లోకి ప్రవేశించిన పాకిస్థాన్ మహిళ సీమా హైదర్‌ ఉదంతం మరువకముందే ఆ తరహా ఘటన మరొకటి జరిగింది. ఈ సారి ఓ భారతీయ మహిళ ఫేస్బుక్ స్నేహితుడిని కలుసుకునేందుకు పాకిస్థాన్ వెళ్లింది.
పోలీసులు తెలిపిన వివరాల ప్రకారం..
Anju Nasrullah Love Story : అంజు(34), అరవింద్ దంపతులు రాజస్థాన్ అల్వార్‌ జిల్లాలోని భివాడీలో నివసిస్తున్నారు. ఈ దంపతులకు 15 ఏళ్ల కుమార్తె, 6 ఏళ్ల కుమారుడు ఉన్నారు. అంజుకు ఫేస్‌బుక్‌లోపాకిస్థాన్కు చెందిన నస్రుల్లా అనే 29 ఏళ్ల యువకుడితో కొన్ని నెలల క్రితం పరిచయం ఏర్పడింది. ఆ పరిచయం కాస్త ప్రేమగా మారింది. ఔషధ రంగంలో పనిచేస్తున్న నస్రుల్లాను కలుసుకోవడానికి అంజు గురువారం వాయవ్య పాకిస్థాన్లోని ఖైబర్‌ పఖ్తుంఖ్వా ప్రావిన్సులో ఉన్న అప్పర్‌ దిర్‌ జిల్లాకు వెళ్లింది. అక్కడి పోలీసులు ఆమెను కస్టడీలోకి తీసుకున్నారు. అయితే వీసాతోపాటు ఇతర అనుమతి పత్రాలన్నీ సక్రమంగా ఉండటం వల్ల ఆమెను విడిచిపెట్టారు.
Anju Pakistan News : జైపుర్లో ఉన్న స్నేహితురాలిని కలవడానికి వెళ్తున్నానని చెప్పి.. తన భార్య పాకిస్థాన్ వెళ్లిపోయిందని మహిళ అంజు భర్త అరవింద్ కుమార్ ఆవేదన వ్యక్తం చేశారు. 'ఆదివారం రాత్రి నా భార్య అంజు.. వాయిస్ కాల్ చేసింది. లాహోర్లో ఉన్నానని చెప్పింది. ఆమె పాకిస్థాన్ ఎందుకు వెళ్లిందో? వీసా ఎలా పొందిందో నాకు తెలియదు. నా భార్య ఫోన్లోని మెసేజ్లను నేనెప్పుడూ తనిఖీ చేయలేదు. ఈ ఘటనపై పోలీసులకు ఇంకా ఫిర్యాదు చేయలేదు. నా భార్య అంజు తిరిగివచ్చాక ఆమెతో కలిసి ఉండాలో? లేదో? నా పిల్లలు నిర్ణయిస్తారు. అంజు నాకు తెలియకుండా బయటకి వెళ్లడం ఇదే మొదటిసారి. నా భార్య నన్ను మోసం చేసింది' అని అరవింద్ చెప్పుకొచ్చారు.