ఆ లేఖ​పై ఉల్ఫా అనుమానాలు!

అసోం ప్రభుత్వం చర్చల విషయంలో ఉల్ఫా సంస్థకు అంతర్జాతీయ మానవ హక్కుల సంఘం నుంచి లేఖ అందింది. ఈ లేఖపై ఉల్ఫా చీఫ్ పరేశ్ బారువా అనుమానం వ్యక్తం చేస్తున్నారు. ఈ లేఖ నిజంగా ఐహెచ్​ఆర్​సీ నుంచే వచ్చిందా అనే దానిపై స్పష్టత రావాల్సి ఉంది.

అసోం యునైటెడ్​ లిబరేషన్ ఫ్రంట్(ఉల్ఫా)కు అంతర్జాతీయ మానవ హక్కుల సంఘం నుంచి ఓ లేఖ అందింది. అసోం ప్రభుత్వంతో చర్చలు జరిపేందుకు ఉల్ఫా సానుకూలంగా స్పందించడంపై ఐహెచ్​ఆర్​సీ హర్షం వ్యక్తం చేసింది. ఈ విషయంలో మధ్యవర్తిత్వం చేసేందుకు సిద్ధంగా ఉన్నట్లు తెలిపింది. అయితే.. ఈ లేఖపై ఉల్ఫా సంస్థ కమాండర్​ ఇన్​ చీఫ్ పరేశ్ బారువా అనుమానం వ్యక్తం చేశారు.

"ఈ లేఖపై మాకు చాలా అనుమానాలున్నాయి. ఐరాసకు సంబంధించిన మానవ హక్కుల సంఘం నుంచి లేఖ వస్తే.. అది జెనీవా నుంచి రావాలి. కానీ, ఇది ముంబయి అడ్రెస్ నుంచి వచ్చింది" అని పరేశ్​ ఈటీవీ భారత్ సీనియర్ రిపోర్టర్ గౌతమ్ బారువాతో చెప్పారు. ఆదివారం గౌతమ్​తో ఫోన్లో మాట్లాడారు.

ప్రభుత్వంతో చర్చలపై స్పందించిన పరేశ్​.. అసోం సర్కారు నుంచి ఇప్పటివరకు లేఖ రాలేదని పేర్కొన్నారు. నూతన సీఎం హిమంత బిశ్వ శర్మ.. ప్రమాణస్వీకారం చేపట్టిన వెంటనే ఉల్ఫాతో చర్చలకు పిలుపునిచ్చారు.

ప్రస్తుతం ఐహెచ్​ఆర్​సీ లేఖపై ఇంకా స్పష్టత రావాల్సి ఉంది.

ఇదీ చదవండి:ULFA: 'ప్రభుత్వంతో చర్చలకు వ్యతిరేకం కాదు'