తాలిబన్​ ఎఫెక్ట్​.. హడావుడిగా 70వేల గన్స్ కొంటున్న భారత్​

70వేల ఏకే-103 రైఫిళ్ల(ak-103 india) అత్యవసర కొనుగోలుకు రష్యాతో ఒప్పందం కుదుర్చుకుంది భారత్​. తాలిబన్ల వశమైన అమెరికా ఆయుధాలు.. క్రమంగా ఇతర ఉగ్రసంస్థల చేతికి చిక్కే అవకాశం ఉన్న నేపథ్యంలో అప్రమత్తంగా ఉండేందుకు ఈ చర్యలు చేపట్టింది భారత్​.

అఫ్గానిస్థాన్​లో అమెరికా విడిచిపెట్టి వెళ్లిన ఆయుధ సామగ్రి తాలిబన్ల చేతికి చిక్కింది. అత్యాధునిక ఆయుధాలతో తాలిబన్లు ఏం చేస్తారోనని ఆందోళన నెలకొంది. అదే సమయంలో తాలిబన్ల నుంచి ఇతర ఉగ్రసంస్థలకు ఆ ఆయుధాలు చేతులు మారే అవకాశం కూడా ఉంది. ఈ నేపథ్యంలో అప్రమత్తమైన భారత వాయుసేన(ఐఏఎఫ్​).. దేశ ఆయుధ సంపత్తిని పెంపొందించుకునే చర్యలను మరింత వేగవంతం చేసింది. ఇందులో భాగంగా.. రష్యా నుంచి 70వేల ఏకే-103(ak-103 india) రైఫిళ్లను అత్యవసరంగా కొనుగోలు చేసింది(iaf news).

ఏకే 103

కొత్తగా కొనుగోలు చేసిన రైఫిళ్లు కొన్ని నెలల్లో అందుబాటులోకి రానున్నాయి. దీని ద్వారా ఉగ్రదాడులను నియంత్రించేందుకు భద్రతా బలగాలు మరింత శక్తిమంతమవుతాయి.

"70వేల ఏకే-102 రైఫిళ్లను రష్యా నుంచి గత వారం అత్యవసరంగా కొనుగోలు చేశాము. ఈ కాంట్రాక్టు విలువ రూ. 300కోట్లు. జమ్ముకశ్మీర్​, శ్రీనగర్ వంటి సున్నిత ప్రాంతాల్లో, వాయుసేన స్థావరాల వద్ద ఉన్న భద్రతా సిబ్బందికి తొలుత అందిస్తాము."

-- ప్రభుత్వ వర్గాలు.

ఈ ఏకే-103.. విధ్వంసకర ఏకే-47కు అప్​గ్రేడెడ్​ వెర్షన్​. ఈ ఏకే-103ని భారత నేవీ ఇప్పటికే వినియోగిస్తోంది. కశ్మీర్​ లోయలోని వూలర్​ లేక్​ వద్ద గస్తీ కాస్తున్న సిబ్బంది వద్ద ఈ తుపాకులు ఉన్నాయి.

మొత్తం మీద ఐఏఎఫ్​కు 1.5లక్షల తుపాకుల అవసరం ఉంది. మిగిలినవి అత్యాధునిక ఏకే-203 తుపాకులతో భర్తీ చేయనుంది(ak-203 india deal).

చైనాతో సరిహద్దు వివాదం తలెత్తినప్పటి నుంచి ఆయుధాల కొనుగోళ్లల్లో జోరు పెంచింది భారత్​. ఆయుధ సంపత్తిని ఆధునికీకరించడంపై శ్రద్ధ పెట్టింది. ఎటువంటి ఆయుధాలు కొనాలనే విషయాన్ని భారత ప్రభుత్వం భద్రతా దళాల ఇష్టానికే వదిలేసింది.

ఇదీ చూడండి:-భారత అమ్ములపొదిలో కొత్త ఆయుధం