ఉత్తర్ప్రదేశ్ గోరఖ్పుర్లో నిర్వహించిన ఎన్నికల ప్రచారంలో కాంగ్రెస్ ప్రధాన కార్యదర్శి ప్రియాంకా గాంధీ వాద్రా కీలక వ్యాఖ్యలు చేశారు. తన నానమ్మ, దేశ మాజీ ప్రధాని ఇందిరా గాంధీ గురించి మాట్లాడుతూ భావోద్వేగానికి గురయ్యారు. ప్రజల నమ్మకాన్ని వమ్ము చేయబోమని, ఇందిరా గాంధీ తమకు అదే నేర్పించారని అన్నారు.
''హత్య చేస్తారని ఆమెకు(మాజీ ప్రధాని ఇందిరా గాంధీ) తెలుసు. కానీ ఎప్పుడూ తలొగ్గలేదు. మీరు ఆమెపై ఉంచిన విశ్వాసం కంటే ఏదీ ఎక్కువ కాదని తనకు తెలుసు. ఆమె నేర్పించిన పాఠాలతోనే.. నేను ఈ రోజు మీ ముందు నిల్చున్నా. నేను కూడా మీ నమ్మకాన్ని ఎప్పుడూ వమ్ముచేయను.''
- ప్రియాంకా గాంధీ, కాంగ్రెస్ ప్రధాన కార్యదర్శి
ప్రాణాలు పోయినా..
'ప్రాణాలైనా ఇస్తా కానీ.. భాజపాతో ఎలాంటి సంబంధం పెట్టుకొనేది లేదు' అని ప్రియాంక తేల్చి చెప్పారు. యూపీలో దళితులు, ఓబీసీలు, పేదవాళ్లు, మైనార్టీలు, బ్రాహ్మణులను యోగి ఆదిత్యనాథ్ ప్రభుత్వం దోచుకుంటోందని ఆరోపించారు. రాష్ట్రంలో గురు గోరఖ్నాథ్ బోధనలకు విరుద్ధంగా ప్రభుత్వాన్ని నడిపిస్తున్నారని దుయ్యబట్టారు. యోగి హయాంలో ప్రజలపై దాడులు బాగా పెరిగిపోయాయని అన్నారు ప్రియాంక. ఉత్తర్ప్రదేశ్లో నిరుద్యోగం ఎక్కువైందని, విద్యార్థుల ఆత్మహత్యలు కలవరపెడుతున్నాయని ఆవేదన వ్యక్తం చేశారు.
''కాంగ్రెస్ ప్రభుత్వం రైల్వేలు, విమానాశ్రయాలు, రోడ్లు నిర్మించింది. ఇప్పుడు భాజపా వాటిని అమ్ముకుంటోంది. 70 ఏళ్లలో కాంగ్రెస్ ఏం చేసిందని వారు అడుగుతున్నారు. ఇన్నేళ్లలో మేం సంపాదించింది భాజపా ఏడేళ్లలో పోగొట్టింది.''