Hybrid Terrorist Killed: జమ్ముకశ్మీర్లోని షోపియాన్ జిల్లాలో మంగళవారం జరిగిన ఉగ్రదాడిలో అరెస్ట్ అయిన లష్కరే తోయిబా 'హైబ్రిడ్ ఉగ్రవాది' ఇమ్రాన్ బషీర్ మరో ముష్కరుడి చేతిలో హతమైనట్లు పోలీసులు తెలిపారు. ఇమ్రాన్ను మంగళవారం పోలీసులు అరెస్టు చేశారు. అతడు ఇచ్చిన సమాచారం మేరకు.. మరో ముష్కరుడి కోసం బుధవారం ఉదయం సోదాలు చేపట్టినట్లు పోలీసులు వెల్లడించారు. ఆ ఉగ్రవాది తమపైకి ఒక్కసారిగా కాల్పులు జరిపాడని, అప్పుడు హైబ్రిడ్ ఉగ్రవాది చనిపోయాడని చెప్పారు.
ఇదీ జరిగింది..
స్థానికేతరులే లక్ష్యంగా మంగళవారం.. షోపియాన్ జిల్లాలోని హర్మేన్ ప్రాంతంలో ఉగ్రవాదులు గ్రెనేడ్ దాడికి పాల్పడ్డారు. ఈ ఘటనలో ఉత్తర్ప్రదేశ్లోని కన్నౌజ్ ప్రాంతానికి చెందిన ఇద్దరు కూలీలు ప్రాణాలు కోల్పోయారు. మృతులను మనీశ్ కుమార్, రామ్ సాగర్లుగా పోలీసులు గుర్తించారు. ఘటన జరిగిన వెంటనే పోలీసులు అప్రమత్తమయ్యారు. క్షణాల్లో ఆ ప్రాంతానికి చేరుకొని ఉగ్రవాదుల కోసం గాలింపులు చేపట్టారు. ఈ క్రమంలోనే గ్రెనేడ్ విసిరిన ఉగ్రవాది ఇమ్రాన్ బషీర్ను అరెస్టు చేశారు. బుధవారం మరో ఉగ్రవాది చేతిలో బషీర్ హతమయ్యాడు.