విద్యార్థులకు విద్యాబుద్ధులు నేర్పి సన్మార్గంలో నడిపిస్తారు గురువులు. కానీ కొందరు ఉపాధ్యాయులు తప్పుడు మార్గంలో నడుస్తూ అసాంఘిక కార్యకలాపాలకు పాల్పడుతున్నారు. అలాంటి సంఘటనే కర్ణాటక బెంగళూరులోని ఓ ఉన్నత పాఠశాలలో జరిగింది. పాఠశాలలోనే ఓ ప్రధానోపాధ్యాయుడు మసాజ్(massage in School) చేయించుకున్నాడు. అదీ.. అడ్మిషన్ కోసం వచ్చిన ఓ విద్యార్థి తల్లితో.. !
ఏం జరిగింది?
ఓ మహిళ తన చిన్నారికి అడ్మిషన్ కోసం నగరంలోని కొదండరామాపుర ఉన్నత పాఠశాలకు వచ్చింది. ఈ క్రమంలో తనకు మసాజ్ చేయాలని ఆ మహిళను ఒత్తిడి చేశాడు ప్రధానోపాధ్యాయుడు లోకేశప్ప. ఈ సంఘటనను ఎవరో వీడియో తీసి సామాజిక మాధ్యమాల్లో పోస్ట్ చేశారు. అది కాస్త వైరల్గా మారగా.. లోకేశప్ప బాగోతం వెలుగులోకి వచ్చింది.
విషయం తెలుసుకున్న బృహత్ బెంగళూరు మహానగర పాలిక.. ఉపాధ్యాయుడిని సస్పెండ్ చేస్తూ బుధవారం సాయంత్రం ఆదేశాలు జారీ చేసింది. పని వేళల్లో తమ బాధ్యతలను మరిచి ఇతర అసాంఘిక కార్యకలాపాలకు పాల్పడినట్లు తేల్చి కర్ణాటక సివిల్ సర్వీసెస్ చట్టం ప్రకారం చర్యలు చేపట్టారు. శాఖా పరమైన విచారణకు ఆదేశించారు ఉన్నతాధికారులు.
ఇదీ చూడండి:'ప్రజలకు చెప్పాల్సిన అధికారే... ఉల్లంఘిస్తున్నాడు!'
