Flower Crown World Record: మహారాష్ట్ర నాగ్పుర్కు చెందిన ప్రముఖ ఫ్లోరల్ ఆర్టిస్ట్ స్వాతి గడేవర్.. పూలతో అరుదైన రికార్డు సాధించారు. కేవలం ఏడు గంటల్లోనే 108 ఫ్లవర్ బ్యాండ్స్లను తయారు చేసి ఒకేసారి ఇండియా బుక్ ఆఫ్ రికార్డ్స్, ఏషియా బుక్ ఆఫ్ రికార్డ్స్లో చోటు సంపాదించారు.
మొదట 7 గంటల్లో 100 పూల కిరీటాలను తయారుచేయాలని భావించగా.. అనుకున్న సమయం కంటే నాలుగు నిమిషాల ముందే.. 108 ఫ్లవర్ బ్యాండ్స్ను తయారు చేసి ఔరా అనిపించారు స్వాతి. ఈ అరుదైన రికార్డులను తన పుట్టినరోజునే అందుకోవడం ఎంతో సంతోషాన్ని ఇచ్చిందన్నారు.
"సోమవారం నా 50వ పుట్టినరోజు. ఈసారి ఏదైనా స్పెషల్గా చేద్దామని రెండేళ్ల క్రితమే నిశ్చయించుకున్నా. ఫ్లోరల్ ఆర్టిస్ట్ను కాబట్టి.. పూల కిరీటాలను తయారు చేద్దామనుకున్నా. చాలాసార్లు ప్రాక్టీస్ చేశాను. ఇండియా, ఆసియా బుక్ ఆఫ్ రికార్డ్స్లో చోటు పొందాను. గతంలో ఒక్కో కిరీటం చేయడానికి అరగంట సమయం పట్టేది. కానీ ఇప్పుడు ఐదు నిమిషాల్లోనే తయారు చేస్తున్నా."