ఉత్తర్ప్రదేశ్ లఖ్నవూలోని ఓ బిర్యానీ రెస్టారెంట్లో మంటలు చెలరేగాయి. ఈ ఘటనలో ఇద్దరు యువకులు తీవ్రంగా కాలిపోయారు. వారిద్దరినీ ఆసుపత్రికి తరలించగా.. అందులో ఓ వ్యక్తి అప్పటికే ప్రాణాలు కోల్పోయినట్లు వైద్యులు ప్రకటించారు. మరో వ్యక్తి కాలిన గాయాలతో ఆసుపత్రిలో చికిత్స పొందుతున్నాడు. సమాచారం అందిన వెంటనే పోలీసులు, అగ్నిమాపక సిబ్బంది ఘటనా స్థలానికి చేరుకుని మంటలను అదుపుచేశారు. ఎల్పీజీ సిలిండర్ లీక్ కావడం వల్లే ప్రమాదం జరిగిందని పోలీసులు స్పష్టం చేశారు.
"చార్‌బాగ్‌లోని కబీర్ హోటల్ బేస్‌మెంట్‌లో బెస్ట్ బిర్యానీ అనే రెస్టారెంట్ ఉంది. ఈ హోటల్‌లో ఒక్కసారిగా మంటలు చెలరేగాయి. మంటలు చెలరేగిన వెంటనే ఆ ప్రాంతంలో తీవ్ర కలకలం రేగింది. దీంతో అక్కడ ఉన్నవారు హడావుడిగా మంటలను అదుపు చేయడం ప్రారంభించారు. దీంతో పాటు వారు అగ్నిమాపక సిబ్బందికి సమాచారం అందించారు. ఘటనా స్థలానికి చేరుకున్న అగ్నిమాపక సిబ్బంది కొద్దిసేపటికే మంటలను అదుపులోకి తెచ్చారు. ఈ ఘటనలో ప్రకాష్ సుధాకర్ అనే వ్యక్తి మరణించినట్లు వైద్యులు తెలిపారు. మంటల్లో 40 శాతం కాలిపోయిన మరో వ్యక్తి అనీస్ షేక్ అలియాస్ బాద్షా చికిత్స పొందుతున్నారు. ఎల్పీజీ గ్యాస్ సిలిండర్ లీక్ కావడం వల్ల ఈ ప్రమాదం జరిగింది. కబీర్ హోటల్‌లోని ఫైర్ సేఫ్టీ పరికరాలు ఉన్నందున మంటలు సకాలంలో అదుపులోకి వచ్చాయి" అని పోలీసులు తెలిపారు.