ఛత్తీస్గఢ్ రాయ్పుర్లోని బైజ్నాథ్ పరా మార్కెట్కు వచ్చిన ఓ మేక అందరి దృష్టిని ఆకర్షించింది. మధ్యప్రదేశ్ అనుప్పూర్కు చెందిన వాహిద్ హుస్సేన్ అనే వ్యక్తి.. మార్కెట్లో విక్రయించేందుకు తీసుకొచ్చిన తన మేకకు రూ.70లక్షలు ధర నిర్ణయించారు. ఈ మేకకు అనేక ప్రత్యేకతలు ఉన్నాయని ఆయన చెబుతున్నారు. ప్రకృతి ఇచ్చిన ప్రసాదం అని అంటున్నారు.
"మేక స్వదేశీ జాతికి చెందినది. ఈ మేక ప్రకృతి ప్రసాదం. దీని శరీరంపై ఉర్దూలో అల్లా, మహమ్మద్ అని రాసి ఉంది. అందుకే ఇది చాలా ప్రత్యేకమైనది. ఇన్ని ప్రత్యేకతలు ఉన్నాయి కాబట్టే దీని ధరను రూ.70 లక్షలుగా నిర్ణయించా. సోషల్ మీడియాలో మేక చిత్రాన్ని పోస్టు చేశా. ఆ చిత్రాన్ని చూసి నాగపుర్కు చెందిన ఓ వ్యక్తి ఫోన్ చేశాడు. రూ.22 లక్షలకు మేకను కొనుగోలు చేస్తానన్నాడు. ఆ ధరకు అమ్మేందుకు నేను అంగీకరించలేదు. ఈ మేకకు మరింత ఎక్కువ ధర లభిస్తుందని ఆశిస్తున్నా. నేను మేకల వ్యాపారిని. నా కుటుంబ ఆర్థిక పరిస్థితి బాగా లేదు. నేను, భార్య కాకుండా ఆరుగురు పిల్లలు ఉన్నారు. అందులో ముగ్గురు కుమార్తెలు, ముగ్గురు కుమారులు ఉన్నారు. మేకను మంచి ధరకు అమ్మగా వచ్చిన డబ్బుతో నా కుమార్తెల పెళ్లి చేస్తాను."
-వాహిద్ హుస్సేన్, మేక యజమాని
మరోవైపు, మధ్యప్రదేశ్.. అగర్ మాల్వా మార్కెట్లో రూ.11 లక్షల విలువైన మేక అమ్మకానికి వచ్చింది. సుస్నేర్ నివాసి షారుక్ ఖాన్ అనే వ్యక్తి ఈ మేకకు యజమాని. ఈ మేక పేరు సుల్తాన్. దాని శరీరంపై అల్లా, మహమ్మద్ అనే ఉర్దూ పేర్ల గుర్తులు ఉన్నాయని.. అందుకే మేకకు రూ.11 లక్షల ధర పెట్టానని చెబుతున్నాడు. సుల్తాన్ రోజుకు 100 గ్రాముల జీడిపప్పు, బాదం పప్పు తింటుందని చెబుతున్నాడు మేక యజమాని షారుక్. ఈ మేక మూడున్నర అడుగుల పొడవు, 60 కేజీల బరువుందని తెలిపాడు.