రామచిలుక వివాదం.. పోలీసు స్టేషన్​లో పంచాయతీ.. సొంతంగా పరిష్కరించిన ప్యారట్!

రామచిలుక విషయంలో రెండు కుటుంబాల మధ్య గొడవ జరిగింది. అయితే ఆ వివాదాన్ని రామచిలుకే పోలీసుల సమక్షంలో తీర్చింది. అదేలా అంటే?

విదేశీ రామచిలుక విషయంలో రెండు కుటుంబాల మధ్య గొడవ జరిగింది. చిలుక తమదేనంటూ ఇరువర్గాలు ఆరోపించుకున్నాయి. ఈ ఘటన ఉత్తర్​ప్రదేశ్​.. ఆగ్రాలోని కమలానగర్​లో​ వెలుగుచూసింది. ఈ నేపథ్యంలో పోలీసులు ఘటనాస్థలికి చేరుకుని సమస్యను పరిష్కరించేందుకు ప్రయత్నించారు. అయినా వివాదం సద్దుమణగకపోవడం వల్ల ఇరువర్గాలను పోలీస్‌స్టేషన్‌కు తరలించారు.

అసలేమైందంటే..?
ఓ వ్యక్తి మూడేళ్ల కిందట విదేశీ రామచిలుకను మరో కుటుంబానికి గిఫ్ట్​గా ఇచ్చాడు. అయితే ప్రస్తుతం ఆ రామచిలుక ధర రూ.60 వేలు పలుకుతోందని తెలుసుకున్న అతడు.. వేరొకరికి విక్రయించాలని అనుకున్నాడు. డబ్బుకు ఆశపడి తాను గిఫ్ట్​గా ఇచ్చిన రామచిలుకను తిరిగి ఇవ్వమని డిమాండ్ చేశాడు. దీంతో ఇరువర్గాల మధ్య గొడవ జరిగింది. తాము ఇన్నిరోజులూ ప్రేమగా పెంచుకున్న చిలుకను ఇచ్చేదే లేదని ఆ కుటుంబం తేల్చి చెప్పింది. ఇక వివాదం కాస్తా పోలీస్ స్టేషన్​కు చేరింది.

.

అయితే, ఇరు కుటుంబాల మధ్య తలెత్తిన సమస్యను రామచిలుక ద్వారానే కొలిక్కి తెచ్చారు పోలీసులు. తొలుత, పోలీస్ స్టేషన్ టేబుల్​పై రామచిలుకను ఉంచారు. అనంతరం ఇరు కుటుంబాలను టేబుల్​కు చెరో వైపు కూర్చొబెట్టారు. పంజరం నుంచి చిలుకను వదిలిపెట్టారు. అప్పుడు చిలుక.. తనను మూడు సంవత్సరాల నుంచి పెంచుతున్న యజమానికి దగ్గరికి వెళ్లింది. దీంతో ఆ కుటుంబానికే రామచిలుకను పోలీసులు అప్పగించారు.

ఇవీ చదవండి: