మైనర్​పై కానిస్టేబుల్​ అత్యాచారం.. చెట్టుకు కట్టేసి మహిళపై..

ప్రియుడిని కలిసేందుకు ఇంటి నుంచి పారిపోయి వచ్చిన ఓ మైనర్​కు సాయం చేస్తానని నమ్మించాడు కానిస్టేబుల్. అనంతరం ఇంటికి తీసుకెళ్లి అత్యాచారానికి పాల్పడ్డాడు. ఈ ఘటన కర్ణాటకలో జరిగింది. మరోవైపు, ఓ మహిళను చెట్టుకు కట్టేసి కొట్టారు భర్త, అత్తమామలు. ఈ దారుణం రాజస్థాన్​లో జరిగింది.

కర్ణాటకలోని బెంగళూరులో దారుణం జరిగింది. ప్రియుడ్ని కలిసేందుకు సాయం చేస్తానని నమ్మించి ఓ మైనర్​పై అత్యాచారానికి పాల్పడ్డాడు ఓ కానిస్టేబుల్. నాలుగు రోజుల కిందట జరిగిన ఈ ఘటన ఆలస్యంగా వెలుగులోకి వచ్చింది. నిందితుడు పవన్ ధ్యావన్నవర్​ను (26) పోలీసులు శుక్రవారం అరెస్టు చేశారు. పవన్.. గోవింద రాజనగర్​ పోలీస్ స్టేషన్​లో కానిస్టేబుల్​గా పనిచేస్తున్నాడు.

మైనర్​పై అత్యాచారానికి పాల్పడిన నిందితుడు

పోలీసులు తెలిపిన వివరాల ప్రకారం: తన ప్రేమ విషయం ఇంట్లో తెలిసిపోవడం వల్ల జులై 25న ఇంటి నుంచి పారిపోయింది 17 ఏళ్ల మైనర్. తన ప్రియుడిని కలిసేందుకు బెంగళూరుకు బయలుదేరింది. బాధితురాల్ని విజయనగర్​లోని ఓ పార్క్​లో చూశాడు కానిస్టేబుల్ పవన్. ఆమెతో మాటలు కలిపాడు. ప్రియుడిని కలిసేందుకు చామరాజనగర్ జిల్లా యళందూర్​ వెళ్లాలనుకున్నట్లు పవన్​కు బాధితురాలు తెలిపింది.

ప్రియుడిని కలిసేందుకు సాయం చేస్తానని నమ్మించి కానిస్టేబుల్.. బాలికను తన ఇంటికి తీసుకెళ్లి అత్యాచారం చేశాడు. అనంతరం ఆమెను చామరాజనగర్​లో వదిలేశాడు. యళందూరు చేరుకున్న బాధితురాలు జరిగిన విషయమంతా తన ప్రియుడితో చెప్పింది. బాధితురాలు కెంపాపుర అగ్రహార పోలీస్ స్టేషన్​లో ఫిర్యాదు చేసింది. నిందితుడిపై పోక్సో చట్టం కింద పోలీసులు కేసు నమోదు చేసుకుని శుక్రవారం అరెస్టు చేశారు. ప్రస్తుతం నిందితుడు జ్యుడీషియల్ కస్టడీలో ఉన్నాడు.

చెట్టుకు కట్టేసి..మహిళను చెట్టుకు కట్టేసి ఓ వ్యక్తి కర్రతో దాడి చేశాడు. మరో ఐదుగురు ఆమె చుట్టూ ఉన్నారు. ఈ వీడియో వైరలై.. జాతీయ మహిళా కమిషన్ ఛైర్​పర్సన్​ రేఖా శర్మ దృష్టికి చేరింది. దీంతో ఆమె వెంటనే నిందితుల్ని అరెస్టు చేయాలని, బాధితురాలికి వైద్యం చేయించాలని రాష్ట్ర డీజీపీకి లేఖ రాశారు. ఈ ఘటన రాజస్థాన్​లోని బాంస్వాడాలో శనివారం జరిగింది. ఆరుగురు నిందితులపై కేసు నమోదు చేసినట్లు పోలీసులు తెలిపారు. నిందితుల్లో బాధితురాలి భర్త, అత్తమామలు కూడా ఉన్నట్లు పోలీసులు తెలిపారు. ఇద్దరు మైనర్లు ఉన్నారని వెల్లడించారు.

బాలుడిపై లైంగిక వేధింపులు:14 ఏళ్ల బాలుడిని లైంగిక వేధింపులకు గురిచేశాడు ఓ పాఠశాల ప్రిన్సిపల్. ఈ ఘటన గుజరాత్​.. సూరత్​లోని మున్సిపల్ పాఠశాలలో జరిగింది. నిందితుడు వ్యాస్​ను పునా పోలీసులు శనివారం రాత్రి అరెస్టు చేశారు. కొన్ని రోజుల క్రితమే విద్యాశాఖ ఉన్నతాధికారులు వ్యాస్​ను సస్పెండ్ చేశారు. బాధితుడు 8వ తరగతి చదువుతున్నాడు. నిందితుడిపై జులై 19న పునా పోలీస్ స్టేషన్​లో పోక్సో చట్టం కింద కేసు నమోదైంది. అప్పటి నుంచి నిందితుడు పరారీలో ఉన్నాడు. బాలుడ్ని లైంగిక వేధింపులకు గురిచేసిన వీడియోలు వ్యాస్ ఫోన్​లో ఉన్నాయని పోలీసులు తెలిపారు.

ఇవీ చదవండి:''ఐదేళ్లు చేస్తాం.. వెళ్లిపోతాం' అంటే కుదరదు'.. ఆ రాష్ట్రాలకు మోదీ వార్నింగ్!