Msp Price Increase : రైతులకు కేంద్ర గుడ్న్యూస్ చెప్పింది. 2023-24 సంవత్సరానికి సంబంధించి ఖరీఫ్ పంటలకు కేంద్ర ప్రభుత్వం.. కనీస మద్దతు ధరలను బుధవారం పెంచింది. సాధారణ వరి క్వింటాల్‌కు 143 రూపాయల మేర పెంచిన కేంద్రం.. ధర రూ.2,183గా నిర్ణయించింది. ఈ మేరకు.. ప్రధాని నరేంద్ర మోదీ అధ్యక్షతన సమావేశమైన ఆర్థిక వ్యవహారాల కేబినెట్ కమిటీ.. ఖరీఫ్ పంటలకు సంబంధించి కనీస మద్దతు ధరలను పెంచింది.
A గ్రేడ్ ధాన్యానికి కనీస మద్దతు ధరను 163 రూపాయల మేర పెంచిన కేంద్రం, ఆ గ్రేడ్ ధరను.. రూ. 2,203 రూపాయలుగా ఖరారు చేసింది. పెసలు కనీస మద్దతు ధరను 10.4 శాతం మేర పెంచి.. రూ. 8,558గా నిర్ణయించింది. ఖరీఫ్ పంటల కనీస మద్దతు ధరల పెంపు అన్నదాతలకు లాభయదాయకంగా ఉంటుందని కేంద్ర మంత్రి పీయూష్ గోయల్ తెలిపారు. అలాగే హరియాణా.. గురుగ్రామ్లో 28.5 కిలోమీటర్ల మెట్రో కనెక్టివిటీకి కేంద్ర కేబినెట్ ఆమోదం తెలిపిందని గోయల్ వెల్లడించారు. ఈ ప్రాజెక్ట్కు రూ.5,452 కోట్లు కేటాయించిందని పేర్కొన్నారు.
- వరి క్వింటాకు కనీస మద్దతు ధర రూ.143 పెరిగి.. రూ.2,183కు చేరింది.
- A గ్రేడ్ ధాన్యానికి కేంద్రం రూ.163 ఎంఎస్పీని కేంద్రం పెంచింది. దీంతో క్వింటా A గ్రేడ్ ధాన్యం ధర రూ.2,203కు చేరింది.
- రాగి కనీస మద్దతు ధర రూ.268 పెంచింది కేంద్రం. దీంతో క్వింటా రాగి ధర రూ.3,846కు చేరింది.
- సజ్జలు ఎంఆర్పీ రూ.150 పెరిగి.. ధర రూ.2,500కు చేరింది.
- హైబ్రిడ్‌ జొన్న క్వింటాల్‌ ధరను రూ.3180గా, జొన్న (మాల్దండి) ధరను రూ.3,225గా నిర్ణయించింది.
- క్వింటా రాగి ధరను రూ.3,846గా, క్వింటా సజ్జలు ధరను రూ.2,500గా కేంద్రం నిర్ణయించింది.
- మొక్కజొన్న రూ.2,090, పొద్దుతిరుగుడు (విత్తనాలు) రూ.6,760, వేరుశెనగ రూ.6,377గా ఉన్నాయి.
- సోయాబీన్‌ రూ.4,600, పత్తి(మధ్యస్థాయి పింజ) రూ.6620, పత్తి (పొడవు పింజ) రూ. 7.020 చొప్పున 2023-24 సీజన్లో ఇవ్వనున్నట్టు కేంద్రం తెలిపింది.