పదవుల ఆశచూపి ప్రజలను మోసం చేస్తున్న ఓ ముఠాను కేంద్ర దర్యాప్తు సంస్థ(సీబీఐ) పట్టుకుంది. రాజ్యసభ సభ్యత్వం, గవర్నర్ పదవి, కేంద్ర ప్రభుత్వ పరిధిలోని వివిధ సంస్థలకు ఛైర్మన్గా స్థానం ఇప్పిస్తామంటూ.. రూ. 100కోట్ల మేర మోసం చేసిన నలుగురిని అదుపులోకి తీసుకున్నట్లు సీబీఐ తెలిపింది. వీరిని కమలాకర్ ప్రేమ్కుమార్, అభిషేక్ బూర, మహ్మద్ అజీజ్ ఖాన్, రవీంద్ర విఠల్ నాయక్గా గుర్తించింది. మరో నిందితుడు పరారీలో ఉన్నారని చెప్పింది. దిల్లీ, ఉత్తర్ప్రదేశ్, మహారాష్ట్ర, కర్ణాటక సహా ఏడు ప్రాంతాల్లో సోదాలు నిర్వహించింది.
కమలాకర్ ప్రేమ్కుమార్.. సీబీఐ ప్రధాన కార్యాలయంలో అధికారినంటూ ప్రజలను మోసం చేస్తున్నాడని ఎఫ్ఐఆర్లో తెలిపింది. రాజ్యసభ సభ్యత్వం, గవర్నర్ పదవి, కేంద్ర ప్రభుత్వ పరిధిలోని వివిధ సంస్థలకు ఛైర్మన్గా స్థానం ఇప్పిస్తానని చెప్పేవాడని పేర్కొంది. కమలాకర్ మరో ముగ్గురు నిందితులు కలిసి ఇప్పటి వరకు సుమారు రూ.100కోట్ల మోసం చేశారని వివరించింది. సీనియర్ అధికారులు, రాజకీయ నేతల పేర్లు వాడుకుంటూ ప్రజలు, పోలీసులను మోసం చేశాడని సీబీఐ వెల్లడించింది. అయితే, నలుగురు నిందితులకు బెయిల్ మంజూరు చేసింది సీబీఐ ప్రత్యేక న్యాయస్థానం.