ఉత్తర్​ప్రదేశ్​లో తొలి 'లవ్​ జిహాద్' కేసు

'లవ్​ జిహాద్' ఆర్డినెన్సు అమలులోకి వచ్చిన తర్వాతి రోజే ఇందుకు సంబంధించిన కేసు వెలుగుచూసింది. బలవంతపు మత మార్పిడికి పాల్పడ్డారని నిందితులపై బరేలీలోని దేవరానియా పోలీసులు ఎఫ్ఐఆర్ నమోదు చేశారు.

ఉత్తర్​ప్రదేశ్​లో 'లవ్​ జిహాద్​'కు సంబంధించి తొలి కేసు నమోదైంది. ఈ చట్టం అమలైన తర్వాత తొలిసారి బరేలీలో బలవంతపు మత మార్పిడి కేసు నమోదైనట్లు అధికారులు తెలిపారు. యోగి ప్రభుత్వం తీసుకొచ్చిన ఈ ఆర్డినెన్సుకు గవర్నర్ ఆనందీబెన్ పటేల్ శనివారం ఆమోదముద్ర వేశారు.

తాజా ఆర్డినెన్సును అనుసరించి దేవరానియా పోలీసులు ఎఫ్​ఐఆర్ రిజిస్టర్ చేశారు. నిందితులపై సెక్షన్ 3/5 ప్రకారం ఆరోపణలు మోపారు. బలవంతంగా మత మార్పిడిని ప్రోత్సహించారని ఎఫ్​ఐఆర్​లో పేర్కొన్నారు.

పదేళ్ల శిక్ష

బలవంతపు మత మార్పిడిలకు వ్యతిరేకంగా ఉత్తర్​ప్రదేశ్ ప్రభుత్వం ఈ ఆర్డినెన్సు తీసుకొచ్చింది. యోగి ఆదిథ్యనాథ్ నేతృత్వంలోని రాష్ట్ర కేబినెట్ నవంబర్​ 24న ఈ ఆర్డినెన్సును ఆమోదించింది. దీని ప్రకారం బలవంతంగా మత మార్పిడులకు పాల్పడేవారికి 10ఏళ్ల వరకు జైలు శిక్ష పడే అవకాశం ఉంది. మత మార్పిడి కోసమే వివాహం చేసుకున్నట్లైతే.. ఆ వివాహాన్ని చెల్లుబాటుకానిదిగా పరిగణిస్తారు.

ఇటీవలి కాలంలో ఉత్తర్​ప్రదేశ్ సహా భాజపా పాలిత రాష్ట్రాలైన హరియాణా, మధ్యప్రదేశ్​ రాష్ట్రాలు ఈ తరహా ఆర్డినెన్సులు తీసుకొస్తున్నట్లు ప్రకటించాయి. ప్రేమ, పెళ్లి పేరిట హిందు మహిళలను బలవంతంగా ఇస్లాం మతంలోకి మారేలా చేస్తున్నారని, వాటిని అరికట్టేందుకు ఈ ఆర్డినెన్సులు ఉపయోగపడతాయని చెబుతున్నాయి. ఈ బలవంతపు మత మార్పిడులనే 'లవ్​ జిహాద్​'గా అభివర్ణిస్తున్నాయి.