Bulldozers In Up: ఉత్తర్ప్రదేశ్లో బుల్డోజర్ కూల్చివేతల పరంపర కొనసాగుతోంది. అత్యాచారం, ఇతర కేసుల్లో నిందితుల ఆస్తులపై బుల్డోజర్లు ప్రతాపం చూపిస్తున్నాయి. ఈ క్రమంలో పేదవారి గుడిసెలు, దుకాణాలను కూల్చివేయరాదని ముఖ్యమంత్రి యోగీ ఆదిత్యనాథ్ అధికారులకు శుక్రవారం స్పష్టమైన ఆదేశాలు ఇచ్చారు. అక్రమార్కుల ఆస్తులపైనే బుల్డోజర్లను వినియోగించాలని తెలిపారు.
"పేదవారి గుడిసెలు, దుకాణాలపై బుల్డోజర్లను ఉపయోగించరాదు. అక్రమంగా సంపాదించి నేరస్థులు కట్టిన కట్టడాలపైనే వాటిని వాడాలి. పేదవారి ఆస్తులను దౌర్జన్యంగా లాగేసుకున్నవారి ఆస్తులపైనే చర్యలు చేపట్టాలి."
-యోగీ ఆదిత్యనాథ్, యూపీ సీఎం
'బుల్డోజర్ బాబా'గా పేరుతెచ్చుకున్న యోగి.. పాలనలో కఠినమైన నిర్ణయాలు తీసుకుంటున్నారు. ఉత్తర్ప్రదేశ్ను నేరస్థులు, మాఫియా నియంత్రించలేరని బుల్డోజర్లతో సమాధానమిస్తున్నారు. దీంతో ప్రభుత్వం పట్ల పేదలకు నమ్మకం పెరుగుతోంది. అధికారులు నేరస్థుల ఇళ్లను బుల్డోజర్లతో పడగొట్టిస్తున్నారు. దీంతో 50 మంది నేరస్థులు స్వచ్ఛందంగా నేరాన్ని ఒప్పుకుని పోలీసులకు లొంగిపోయారు. ప్రముఖ రాజకీయ నాయకులు సైతం ఇందుకు మినహాయింపు కాదు. సమాజ్వాదీ పార్టీ ఎమ్మెల్యే షాజిల్ ఇస్లామ్ అన్సారీకి చెందిన పెట్రోల్ బంక్ను అధికారులు గురువారం కూల్చేశారు. బరేలీ-దిల్లీ జాతీయ రహదారిపై పర్సాఖేడా వద్ద ఉన్న బంక్ను అక్రమంగా నిర్మించారన్నది వారి వాదన. ఇదే విషయంపై ఇప్పటికే నోటీసులు ఇచ్చినా స్పందన లేదని.. అందుకే ఈ చర్యలు చేపట్టినట్టు చెప్పారు బరేలీ అభివృద్ధి ప్రాధికార సంస్థ(బీడీఏ) వైస్ ఛైర్మన్ జోగేంద్ర సింగ్.
ఇదీ చదవండి:యోగికి వార్నింగ్ ఇచ్చిన ఎమ్మెల్యేకు 'బుల్డోజర్ దెబ్బ'- పెట్రోల్ బంక్ ఫసక్!
