ఆ రాష్ట్ర రాజకీయాల్ని కుదిపేస్తున్న పురందేశ్వరి వ్యాఖ్యలు

ఛత్తీస్​గఢ్ భాజపా ఇన్​ఛార్జ్​ పురందేశ్వరి చేసిన వ్యాఖ్యలు తీవ్ర రాజకీయ దుమారాన్ని రేపాయి. భాజపా కార్యకర్తలు ఉమ్మితే.. సీఎం భూపేశ్ బఘేల్​, ఆయన కేబినెట్ అందులో​ కొట్టుకుపోతుందని ఆమె అన్నారు. దీనిపై బఘేల్​ కూడా ఘాటుగా స్పందించారు.

భాజపా జాతీయ కార్యదర్శి దగ్గుబాటి పురందేశ్వరి ఓ కార్యక్రమంలో చేసిన వ్యాఖ్యలు రాజకీయంగా దుమారం రేపాయి. భాజపా కార్యకర్తలంతా కలిసి ఉమ్మితే.. ఛత్తీస్​గఢ్​ సీఎం భూపేశ్ బఘేల్​, ఆయన కేబినెట్​ ఆ ఉమ్ములో కొట్టుకుపోతుందని వ్యాఖ్యానించారు. ఛత్తీస్​గఢ్ ఇన్​ఛార్జ్​గా ఉన్న ఆమె.. బస్తర్ జిల్లా కేంద్రం జగదల్​పుర్​లో భాజపా కార్యకర్తల సదస్సుకు హాజరై గురువారం ఈ వ్యాఖ్యలు చేశారు.

కార్యకర్తలు కష్టపడితే 2023లో రాష్ట్రంలో భాజపా కచ్చితంగా అధికారంలోకి వస్తుందని పురందేశ్వరి అన్నారు. వచ్చే అసెంబ్లీ ఎన్నికలకు వ్యూహాత్మక సన్నద్ధతపై మూడు రోజుల పాటు ఈ సదస్సు నిర్వహించారు.

సీఎం ఘాటు స్పందన..

పురందేశ్వరి వ్యాఖ్యలపై సీఎం భూపేశ్ బఘేల్ కూడా ఘాటుగా స్పందించారు. ఆమె మానసిక స్థితి ఇంత దిగజారుతుందని తాను ఊహించలేదన్నారు. పురందేశ్వరి కాంగ్రెస్​ హయాంలో కేంద్ర సహాయమంత్రిగా పనిచేసినప్పుడు బాగానే ఉన్నారని, భాజపాలో చేరిన తర్వాతే ఇలా మారిపోయారని విమర్శించారు. ఆకాశంలోకి ఉమ్మితే అది తిరిగి వారి మొహం మీదే పడుతుందని చురకలంటించారు.

కార్యక్రమంలో పాల్గొన్న పురందేశ్వరి

ఇదీ చదవండి:'కుల ధ్రువీకరణపై పదేపదే విచారణ హానికరం'