పోలీసు చొరవ, బైకర్​ సాహసంతో బామ్మకు మందులు

ఓ బైకర్, ఓ పోలీసు చేసిన పని ఇప్పుడు నెట్టింట మన్ననలు పొందుతోంది. మానవత్వం ఇంకా బతికే ఉందనే కామెంట్లు వినబడుతున్నాయి. ఇంతకీ వారు ఏం చేశారంటే..

మానవత్వానికి ప్రతీకలుగా నిలిచారు ఓ తమిళనాడు పోలీసు, మరో కర్ణాటక బైకర్. బస్సులో ఉన్న ఓ మహిళ చేజార్చుకున్న మందులను ఛేజ్​ చేసి మరీ ఆమెకు చేరవేర్చగలిగారు వీరిద్దరూ. ఈ వీడియో కాస్తా వైరల్​ కాగా.. వారికి సామాజిక మాధ్యమాల్లో ప్రశంసలు లభిస్తున్నాయి.

వీడియోలో.. బైకర్​ (ఆనీ అరుణ్)ను ఆపి.. అతను కర్ణాటకకు చెందిన వాడేనా? అని పోలీసు ఆరాదీస్తాడు. అరుణ్ అవుననగానే.. 'ఇదే దారిలో ముందు ఓ కర్ణాటక బస్సు వెళ్తోంది. అందులో ఉన్న ఓ వృద్ధురాలు ఈ మందులు పోగొట్టుకున్నారు. కాస్త బస్సును ఛేజ్​ చేసి ఇది ఆవిడకు అందించగలవా..' అని అడుగుతాడు పోలీసు.

దీంతో బస్సును ఛేజ్ చేసిన అరుణ్.. మందులను వృద్ధురాలికి అందిస్తాడు. ఈ వీడియోను షేర్​ చేయకుండా ఉండలేకపోతున్నా అంటూ యూట్యూబ్​లో దానిని పెట్టేశాడు. అంతే దానికి నెటిజన్ల నుంచి విపరీతమైన స్పందన లభిస్తోంది. పోలీసుతో పాటు అరుణ్​ను వారు తెగ పొగిడేస్తున్నారు.

ఇదీ చూడండి:మూర్తీభవించిన మానవత్వం.. అనాథ శవాన్ని మోసిన మహిళా ఎస్సై