అధిక సీట్లు గెలుచుకుని, బిహార్ ఎన్డీఏలో సీనియర్ భాగస్వామిగా అవతరించింది భాజపా కానీ 2019 లోక్సభ ఎన్నికల స్థాయిలో మాత్రం ఓట్లను రాబట్టుకోలేక పోయింది. నాడు ఎల్జేపీతో కలిసి ఎన్డీఏకు రాష్ట్రంలో 53శాతం ఓట్లు.. మొత్తం 40 ఎంపీ స్థానాల్లో 39 సీట్లు దక్కాయి.
ఎన్నికల కమిషన్ ప్రస్తుత గణాంకాల ప్రకారం ..
- ఎన్డీఏకు 40శాతం లోపు ఓట్లే పోలయ్యాయి. ఆ ర్జేడీ నేతృత్వంలోని మహాకూటమి 37శాతం ఓట్లకు పరిమితమైంది.
- 2019 సార్వత్రిక ఎన్నికల్లో 21.81శాతం ఓట్లు పొందిన జేడీ(యూ)...ఇప్పుడు 15శాతం ఓట్లే తెచ్చుకుంది. నాడు 23.58శాతం ఓట్లు రాబట్టిన కాషాయ పార్టీ..తాజాగా 20శాతం ఓట్లకే పరిమితమైంది.
- పలు రాష్ట్రాల్లో జరిగిన ఉపఎన్నికల్లోనూ భాజపా ఓట్ల శాతం తగ్గింది. ఆ పార్టీకి ఝార్ఖండ్లో 33(2019లో 55శాతం), హరియాణాలో 36(2019లో 58శాతం) ఓట్లు పోలయ్యాయి.
చతికిలపడ్డ ఎల్జేపీ..
బిహార్ ఎన్నికల్లో యువకెరటం చిరాగ్ పాసవాన్ నేతృత్వంలోని ఎల్జేపీ సత్తా చాటలేక చతికిల పడింది. ఎన్డీఏతో విభేదించి ఒంటరిగా పోటీ చేసిన చిరాగ్ పాసవాన్ సాహసం ఎంతో కొంత ఫలిస్తుందన్న అంచనాలన్నీ తాజా ఫలితాలతో పటాపంచలయ్యాయి. తండ్రి రాంవిలాస్ పాసవాన్ మరణం కారణంగా సానుభూతి వెల్లువెత్తి ఆయనకు చెప్పుకోదగ్గ స్థాయిలో ఓట్లు దక్కుతాయన్న విశ్లేషణలూ తప్పాయి. గత ఎన్నికల్లో గెల్చుకున్న రెండు స్థానాలనూ ఆ పార్టీ కాపాడుకోలేక పోయింది. అతి కష్టంమీద ఒక్క సీటును గెలుచుకోగలిగింది. ఓట్ల శాతాన్ని స్వల్పంగా పెంచుకోవటమే ఆపార్టీకి దక్కిన ఊరట. అయితే జేడీయూ ఓట్లకు భారీగా గండికొట్టి ఆ పార్టీ విజయావకాశాలను దెబ్బతీసినట్లు ఫలితాల సరళి చెబుతోంది.
7 లక్షల మంది 'నోటా' వైపు
బిహార్ ఎన్నికల్లో దాదాపు 7 లక్షల మంది ఓటర్లకు తమ అభ్యర్థులు నచ్చలేదని తేలింది. మూడు దఫాల్లో జరిగిన ఎన్నికల్లో వీరందరూ నోటా(నన్ ఆఫ్ ది ఎబోవ్)మీట నొక్కినట్లు ఎన్నికల సంఘం వెల్లడించింది. ఇది పోలైన ఓట్లలో 1.69శాతంతో సమానం. 2013లో నోటా ఎంపికను ఓటింగ్ యంత్రాల్లోకి చేర్చింది ఈసీ.
