జకీర్​ నాయక్​ ఖాతాల్లో కోట్లాది అక్రమ నిధులు

వివాదాస్పద ఇస్లామిక్​ మతప్రబోధకుడు జకీర్​ నాయక్​కు చెందిన ట్రస్టు, వ్యక్తిగత ఖాతాల్లో కోట్ల రూపాయల నిధులు విరాళాల రూపంలో సమకూరినట్లు ఎన్​ఫోర్స్​మెంట్​ డైరెక్టరేట్ ​(ఈడీ ) వెల్లడించింది. ఈ బ్యాంకు డిపాజిట్లన్నీ శ్రేయోభిలాషులు అనే పేరుతో వచ్చినందు వల్ల దాతల వివరాలు గుర్తించలేక పోయినట్లు అధికారులు తెలిపారు.

ఇస్లామిక్ మతప్రబోధకుడు జకీర్ నాయక్​పై ముస్లిం యువతను తీవ్రవాదం వైపు దారిమళ్లిస్తున్నారనే ఆరోపణలున్నాయి. తాజాగా జకీర్ నాయక్​కు అక్రమ మార్గంలో కోట్లాది రూపాయల విరాళాలు అందినట్లు ఎన్​పోర్స్​మెంట్ డైరెక్టరేట్​ గుర్తించింది. జకీర్ నిర్వహించే ట్రస్టు, ఆయన వ్యక్తిగత ఖాతాల్లోకి కొన్నేళ్లుగా అజ్ఞాత శ్రేయోభిలాషుల నుంచి వేల కోట్లు జమయినట్లు అధికారులు తెలిపారు.

విదేశాల నుంచి విరాళాలు..

జకీర్​ ప్రసంగాలకు ఆకర్షితులై యూఏఈ, సౌది అరేబియా, బహ్రెయిన్​, కువైట్​, ఒమన్​, మలేసియా వంటి దేశాల నుంచి ఆయన శ్రేయోభిలాషులు భారీ నిధులు పంపారు. వివిధ బ్యాంకుల్లో శ్రేయోభిలాషులు అనే పేరుతో డిపాజిట్​ చేసినందువల్ల సొమ్ము ఎవరు పంపారనే వివరాలు గుర్తించలేక పోయినట్లు అధికారులు తెలిపారు.
ఈడీ విచారణను తప్పించుకునేందుకు ప్రస్తుతం మలేసియాలో తలదాచుకుంటున్నారు జకీర్​.

ఇస్లామిక్​ రీసెర్చ్​ ఫౌండేషన్​ (ఐఆర్​ఎఫ్​​) ట్రస్టును ముంబయి కేంద్రంగా నిర్వహిస్తున్నారు జకీర్​. 2003 నుంచి 2017 మధ్య కాలంలో రూ.64.86 కోట్లు ఐఆర్​ఎఫ్​ బ్యాంకు ఖాతాల్లో జమయ్యాయని ఈడీ తెలిపింది.

అక్రమ ఆదాయం..

రూ. 49.20 కోట్లను జకీర్​ తన ఆదాయంలో చూపలేదు. నిబంధనలకు విరుద్ధంగా నిధులు సమకూరినందువల్ల అక్రమ నగదు బదిలీ నియంత్రణ చట్టం (పీఎంఎల్​ఏ) కింద కేసు నమోదు చేసింది ఈడీ. జాతీయ దర్యాప్తు సంస్థ (ఎన్​ఐఏ) ఎఫ్​ఐఆర్​ ఆధారంగా జకీర్‌ నాయక్‌పై 2016లో ఈడీ మనీ లాండరింగ్‌ కేసు నమోదు చేసింది. మొత్తం రూ.193.06 కోట్ల అనధికారిక నగదు ఉన్నట్లు అభియోగ పత్రంలో పేర్కొంది.

ఇదీ చూడండి: కేరళపై ఐసిస్ కుట్ర.. యంత్రాంగం అప్రమత్తం