'ప్లాస్టిక్'​పై 30 వేల అక్షరాలు.. ఇండియా బుక్​లో చోటు

ప్లాస్టిక్ మహమ్మారిని తరిమికొట్టాలని ఎన్ని విధాలుగా హెచ్చరించినా.. పెద్దగా ఎవ్వరూ దృష్టిసారించట్లేదు. కానీ, కర్ణాటకకు చెందిన ఓ యువకుడు మాత్రం ప్లాస్టిక్​పై పోరుకు దిగాడు. ప్లాస్టిక్ బాటిల్​పైనే 1,829 సార్లు 'ప్లాస్టిక్ వాడకండి' అని రాసి రికార్డు సృష్టించాడు.

ప్లాస్టిక్ నిషేధంపై అవగాహన కల్పిస్తూ.. ప్లాస్టిక్ బాటిల్ మీదే 1,829 సార్లు 'ప్లాస్టిక్ వాడకండి' అని రాసి ఇండియా బుక్ ఆఫ్ రికార్డు కైవసం చేసుకున్నాడు కర్ణాటకకు చెందిన ఓ యువకుడు.

రామనగర జిల్లా, చన్నపట్న తాలూకా, కొడంబల్లి గ్రామానికి చెందిన శివకుమార్ సాధారణ జిమ్ కోచ్. అంతేకాదు అంతర్జాతీయ స్థాయిలో యోగా ప్రదర్శకుడు కూడా. శారీరక ఆరోగ్య ప్రాముఖ్యత తెలిసిన శివకుమార్.. పర్యావరణం ఆరోగ్యంగా ఉంటేనే భవిష్యత్తు ఆరోగ్యంగా ఉంటుందని భావించాడు. ప్లాస్టిక్ మహమ్మారిని తరిమికొడితే ప్రకృతికి పట్టిన పీడ సగం నయమవుతుందని బలంగా నమ్మాడు.

ప్లాస్టిక్ పైనే 'ప్లాస్టిక్ వాడకండి' 1,829 సార్లు రాసి రికార్డు!

మన జీవితాల్లో భాగమైపోయిన ప్లాస్టిక్​ను శివకుమార్​ అంత తేలిగ్గా వదిలించుకోలేకపోయాడు. అందుకే ఆ బాధను ప్లాస్టిక్ బాటిల్ మీద 30,041 అక్షరాలతో, 1,829 సార్లు 'ప్లాస్టిక్ వాడకండి' అని రాసి తెలిపాడు. ఈ బాటిల్ మీద 292 సార్లు 'ప్రపంచం' , 595 సార్లు 'ఇండియా' పదాలను వాడాడు. ఇలా ప్లాస్టిక్ నిషేధంపై వినూత్న రీతిలో అవగాహనలో భాగంగా అతడి కృషికి 'ఇండియా బుక్ ఆఫ్ రికార్డ్స్'లో చోటు దక్కింది.

"నేను ఇదంతా రికార్డు కోసం చేయలేదు. కేవలం అవగాహన కల్పించడానికి మాత్రమే చేశాను. బాధాకరమైన విషయం ఏమిటంటే నేను కూడా నా జీవితం నుంచి పూర్తిగా ప్లాస్టిక్​ను నిషేధించలేకపోతున్నాను. అందుకే, ఆ బాధను ఇలా బాటిల్​పై అక్షరాలతో తెలిపాను. ప్రజలు స్వచ్ఛందంగా ప్లాస్టిక్ వాడకాన్ని తగ్గించి పర్యావరణాన్ని రక్షించాలి."

-- శివకుమార్

తమ గ్రామానికి చెందిన శివకుమార్ ప్లాస్టిక్ మహమ్మారిపై చేస్తున్న పోరాటానికి సలాం చేస్తున్నారు గ్రామస్థులు. రాష్ట్ర, కేంద్ర ప్రభుత్వాలు ప్లాస్టిక్ తయారీ నిలిపేస్తేనే దేశంలో ప్లాస్టిక్ అంతం అవుతుందంటున్నారు.

ఇదీ చదవండి: ఇక ఖాతాదార్లకు ఇంటికే బ్యాంకు సేవలొస్తాయ్​!