'గగనయాన్​'కు ఎంపికైన ఒడిశా పైలట్!

ప్రతిష్ఠాత్మక చంద్రయాన్​-2 విజయాన్ని ఆస్వాదిస్తున్న భారతీయులకు ఇస్రో నుంచి మరో తీపి కబురు అందించింది. మిషన్​ గగనయాన్​కు ఏర్పాట్లు చకచకా చేసేస్తోంది. ఇప్పటికే గగన్​యాన్​​లో పంపే వ్యోమగాములను తయారు చేసేందుకు మొదటి దశలో పైలట్లను ఎంపిక ​ చేసేసింది. ఒడిశాకు చెందిన నిఖిల్​ రథ్​ తొలి అవకాశాన్ని పట్టేశారు.

మిషన్​ గగనయాన్​లో అంతరిక్షంలోకి వెళ్లేందుకు వ్యోమగా​మి శిక్షణకు నిఖిల్​ రథ్​ ఎంపికయ్యారు.

చంద్రయాన్​-2 ప్రయోగం తర్వాత మానవ సహిత యాత్ర​ గగనయాన్​కు ​శ్రీకారం చుట్టనుంది భారతీయ అంతరిక్ష పరిశోధనా కేంద్రం(ఇస్రో). ఈ ప్రయోగానికి ప్రభుత్వం 10 వేల కోట్లు వెచ్చించనుందని స్వతంత్ర్య దినోత్సవం సందర్భంగా ప్రధాని మోదీ 2018లోనే ప్రకటించారు.
2022లో పయనమయ్యే ఈ గగన యాత్రకు వ్యోమగాములను సిద్ధం చేసేందుకు ఇప్పటికే కసరత్తులు ప్రారంభించింది. ఇందులో భాగంగానే శిక్షణ ఇచ్చేందుకు టెస్ట్​ పైలట్లను ఎంపిక చేసింది. మొదటి దశలో 25 పైలట్లను పరీక్షించగా ఒడిశాకు చెందిన నిఖిల్​ రథ్​ మాత్రమే శిక్షణకు ఎంపికయ్యారు.

అశోక్​ రథ్​, కుసుమ్​ రథ్​ల తనయుడు నిఖిల్​ రథ్.​ భారత వాయుదళంలో వింగ్​ కమాండర్​గా విధులు నిర్వర్తించి ఇప్పుడు అంతరిక్షంలోకి వెళ్లేందుకు శిక్షణ పొందే అరుదైన అవకాశం సాధించారు.
ఇదీ చూడండి:'విక్రమ్'​కు ఏం కాలేదు.. ఆశలు సజీవమే: ఇస్రో