'1984 నాటి పరిస్థితులు పునరావృతం కానివ్వం'

ఈశాన్య దిల్లీ అల్లర్ల విషయంలో పోలీసులను ప్రశంసించింది దిల్లీ హైకోర్టు. సమయానికి స్పందించి క్షతగాత్రులను ఆసుపత్రికి చేర్చారని కితాబిచ్చింది. బాధితులకు భరోసా కల్పించేందుకు ప్రభుత్వాధినేతలు ప్రభావిత ప్రాంతాల్లో పర్యటించాలని నిర్దేశించింది. దేశంలో 1984 నాటి పరిస్థితులు పునరావృతం కానివ్వమని స్పష్టం చేసింది దిల్లీ హైకోర్టు.

దేశ రాజధానిలో జరిగిన అల్లర్లలో క్షతగాత్రులను రక్షించటంలో పోలీసుల పాత్రను ప్రశంసించింది దిల్లీ హైకోర్టు. అర్ధరాత్రి ఆదేశాలు జారీ చేసినప్పటికీ పోలీసులు తక్షణమే స్పందించి.. గాయపడ్డవారిని ఆసుపత్రికి తరలించారని తెలిపింది.

దిల్లీలో జరిగిన అల్లర్లపై విచారించిన జస్టిస్​ ఎస్​.మురళీధరన్​, జస్టిస్​ భాంభణి నేతృత్వంలో ధర్మాసనం... దేశంలో 1984 నాటి పరిస్థితులు పునరావృతం కానివ్వబోమని స్పష్టం చేసింది. ఘర్షణల్లో ఐబీ అధికారి మృతి దురదృష్టకరమని వ్యాఖ్యానించింది.

బాధితులకు భరోసా కల్పించాలి..

దేశరాజధానిలో ఘర్షణల ప్రభావిత ప్రాంతాల్లో ప్రభుత్వాధినేతలు పర్యటించాల్సిన అవసరం ఉందని దిల్లీ హైకోర్టు అభిప్రాయపడింది.

ముఖ్యమంత్రి, ఉప ముఖ్యమంత్రి పదవుల్లో ఉన్నవారు అల్లర్లు జరిగిన ప్రాంతాల్లోని ప్రజలను కలిసి, వారికి భరోసా కల్పించాలని నిర్దేశించింది దిల్లీ హైకోర్టు. చట్టం అమలు అవుతోందని వారికి అర్థమయ్యేలా చేయాలని సూచించింది.

ఇదీ చూడండి:దిల్లీకి మరిన్ని బలగాలు... హోంశాఖ నిర్ణయం!