మీ పేరు కమల అయితే.. ఈ ఆఫర్​ మీకే!

కమలా హారిస్​... అమెరికా ఉపాధ్యక్షురాలిగా ఈ మధ్యనే ప్రమాణ స్వీకారం చేశారు. భారతీయ మూలాలు ఉన్న మహిళ కావడంతో ఆమె అందుకున్న విజయాన్ని కమల అనే పేరు ఉన్న వారందరికి పంచాలి అనుకుంది ఓ థీమ్ పార్క్​. ఈ పేరుతో ఉన్న వారందరికీ ఈ నెల 24 సరదాగా గడిపే అవకాశం ఇచ్చింది. ఇందుకు సంబంధించిన పూర్తి వివరాలు తెలుసుకోవాలి అంటే స్టోరీలోకి వెళ్లాల్సిందే.

కమలా హారిస్, కమలా హారిస్..ఇప్పుడు అమెరికాతో పాటు ప్రపంచమంతా ఈ పేరు మారుమోగుతోంది. ఇక, భారత్ సంగతి సరే సరి. అమెరికా ఉపాధ్య పదవి చేపట్టి ఆమె చరిత్ర సృష్టిస్తే..భారత్‌లోని 'కమల'లు మాత్రం బంఫర్ ఆఫర్ కొట్టేశారు. ఆమె విజయానికి గుర్తుగా, జనవరి 24, 2021 సరదాగా గడిపే అవకాశాన్ని పొందారు. ఇంతకీ విషయం ఏంటంటే..

అమెరికా ఉపాధ్యక్ష పదవిని చేప్టటిన మొదటి మహిళగా కమలాహారిస్ రికార్డు సృష్టించిన సంగతి తెలిసిందే. ఆమె భారత సంతతి మహిళ కూడా. అందుకే 'వండర్‌ లా' థీమ్ పార్క్‌ ఈ విజయాన్ని సెలబ్రేట్ చేసుకోవాలనుకుంది. దానికి గుర్తుగా కమల పేరుతో ఉన్న వ్యక్తులకు రేపు ఈ పార్క్‌ను ఉచితంగా వీక్షించే అవకాశాన్ని అందించింది. దీనికి సంబంధించిన వివరాలను వండర్‌ లా ఫేస్‌బుక్‌లో పోస్టు చేసింది.

'ఈ ఆదివారం కమలలందరి విజయం. జనవరి 24, 2021న కమల పేరుతో ఉన్నవారికి ఉచిత ప్రవేశం ఉంది. వారు చెల్లుబాటు అయ్యే గుర్తింపు కార్డు చూపించాల్సి ఉంటుంది. బెంగళూరు, కొచ్చి, హైదరాబాద్‌లోని వండర్‌ లా థీమ్ పార్కుల్లో ఈ ఆఫర్ అందుబాటులో ఉండనుంది. కమలా, కమల్​, కమలం ఈ పేర్లతో ఉన్నవారు ఈ ప్రత్యేక సదుపాయాన్ని పొందనున్నారు' అని ఆ పోస్టులో రాసుకొచ్చింది. అలాగే మొదటగా వచ్చిన 100 మంది వీక్షకులకు మాత్రమే ఈ ఆఫర్ అందుబాటులో ఉండునుందని పార్క్‌ యాజమాన్యం స్పష్టం చేసింది.