'370 రద్దుతో కశ్మీరీ​ గ్రామాలకు స్వయం సమృద్ధత'

370 ఆర్టికల్​ రద్దుతో జమ్ముకశ్మీర్​ ఆర్థికంగా బలోపేతం అవుతుందని ఉపరాష్ట్రపతి వెంకయ్యనాయుడు ఉద్ఘాటించారు. స్థానిక సంస్థలకు అధికారాలు పెరిగి స్వయం సమృద్ధి సాధిస్తాయని స్పష్టం చేశారు. కశ్మీర్​కు చెందిన పంచాయతీ సర్పంచ్​లతో సమావేశమైన వెంకయ్య.. వాళ్ల డిమాండ్లకు సానుకూలంగా స్పందించారు.

జమ్ము కశ్మీర్​లో పరిస్థితులపై చర్చించేందుకు ఉపరాష్ట్రపతి వెంకయ్యనాయుడితో ఆ రాష్ట్రంలోని సర్పంచ్​లు దిల్లీలో సమావేశమయ్యారు. అక్కడి క్షేత్ర స్థాయి సమస్యలపై ఆయనతో చర్చించి వాటిని పరిష్కరించాలని కోరారు. రాష్ట్రంలో పరిస్థితులు తొందరగా అదుపులోకి వచ్చేలా చర్యలు తీసుకోవాలని అభ్యర్థించారు.

"వచ్చేది పండ్ల సీజన్​. ఈ విషయంలోనే మా చింత. ఈ పరిస్థితుల్లో కశ్మీర్​ నుంచి పండ్లను ఎలా ఎగుమతి చెయ్యాలి? ఇది సాధ్యం కాకపోతే కశ్మీర్​ ఆర్థిక వ్యవస్థ కుదేలవుతుంది. మా సమస్యలన్నీ విన్నవించగా.. ఉపరాష్ట్రపతి సానుకూలంగా స్పందించారు. మిగతా రాష్ట్రాల మాదిరిగానే మా గ్రామాలు అభివృద్ధి చెందేలా పూర్తి చర్యలు తీసుకుంటామని హామీ ఇవ్వటం సంతోషంగా ఉంది."

-సర్పంచ్​

పంచాయతీలకు పూర్తి స్థాయి అధికారాలు ఇస్తే గ్రామాల్లో అభివృద్ధి సాధ్యమవుతుందని పలువురు ఆశాభావం వ్యక్తం చేశారు.

"మా ముఖ్య డిమాండ్​.. 370 రద్దు తర్వాత పంచాయతీలకు బాధ్యతలు పెరగాలి. భూములపై పూర్తి స్థాయి అధికారాలు రావాలి. 73,74 అధికరణల ప్రకారం కశ్మీర్​లో పంచాయతీ వ్యవస్థ బలపడుతుంది. పనులు తొందరగా పూర్తవుతాయి. నిధులు వస్తాయి. సర్పంచ్​, పంచ్​లకు ఇంకా అధికారాలు పెరిగితే గ్రామ స్థాయిలో అన్ని పనులు చేసేందుకు వీలుంటుంది."

-సర్పంచ్​

ఇందుకు సానుకూలంగా స్పందించిన వెంకయ్య.. పంచాయతీలకు పూర్తి స్థాయి అధికారాలు లభిస్తాయని హామీ ఇచ్చారు. 370 రద్దు తర్వాత కేంద్ర ప్రభుత్వ చట్టాలు, 73,74 అధికరణలు అమలులోకి వస్తాయని చెప్పారు. రెండు కేంద్రపాలిత ప్రాంతాల్లో గ్రామాలు పుష్కలంగా నిధులు పొందుతాయని స్పష్టం చేశారు.

"పంచాయతీలకు ఆర్థిక అధికారం 10 రెట్లు పెరిగి రూ.లక్షకు చేరింది. నూతన చట్టంతో అందుకు తగిన నిధులు పంచాయతీలకు అందుతాయి. రెండో విషయం.. వాళ్ల ఆదాయం కూడా పెరుగుతుంది. ఐసీడీఎస్​ (అంగన్​వాడీ), ప్రధానమంత్రి అవాజ్​ యోజన, సడక్​ యోజన.. చాలా పథకాలు ఉన్నాయి. వీటన్నింటిపై పంచాయతీలకు సామాజిక అధికారం లభిస్తుంది. "

-వెంకయ్యనాయుడు, ఉపరాష్ట్రపతి

ఇదీ చూడండి: కశ్మీర్ ఆస్తులు, అప్పుల పంపకాల కోసం సలహా కమిటీ