డీఆర్​డీఓకు ప్రధాని మోదీ ప్రశంసలు

హైపర్​సోనిక్​ సాంకేతికతను విజయవంతంగా ప్రయోగించినందుకు భారత రక్షణ పరిశోధన, అభివృద్ధి సంస్థ (డీఆర్​డీఓ)ను ప్రధాని నరేంద్ర మోదీ అభినందించారు. దేశీయంగా అభివృద్ధి చేసిన ఈ వాహక నౌకను ఒడిశా వీలర్​ ఐలాండ్​ నుంచి ప్రయోగించింది డీఆర్​డీఓ.

దేశీయంగా అభివృద్ధి చేసిన 'హైపర్​సోనిక్​ సాంకేతిక క్షిపణి వాహక నౌక' (హెచ్​ఎస్​టీడీవీ)ను విజయవతంగా ప్రయోగించినందుకు భారత రక్షణ పరిశోధన సంస్థ(డీఆర్​డీఓ)ను ప్రశంసించారు ప్రధాని నరేంద్ర మోదీ. ప్రయోగం విజయం సాధించడం వల్ల.. ఈ సామర్థ్యం కలిగిన దేశాల సరసన భారత్​ నిలిచిందని వెల్లడించారు.

"హైపర్​సోనిక్​ సాంకేతిక క్షిపణిని విజయవంతంగా ప్రయోగించినందుకు డీఆర్​డీఓకు అభినందనలు. మన శాస్త్రవేత్తలు అభివృద్ధి చేసిన స్క్రామ్‌జెట్ ఇంజిన్​తో విమానం... ధ్వని కంటే 6 రెట్లు వేగంతో ప్రయాణించగలదు. ఇలాంటి సామర్థ్యం గల దేశాలు చాలా తక్కవగా ఉన్నాయి."

నరేంద్ర మోదీ, ప్రధాని.

హైపర్​సోనిక్ సాంకేతికతను డీఆర్‌డీఓ అభివృద్ధి చేసింది. ఒడిశా వీలర్ ఐలాండ్​లోని డాక్టర్​ ఏపీజే అబ్దుల్​ కలాం లాంచ్ కాంప్లెక్స్​ నుంచి ఈ వాహక నౌకను ప్రయోగించింది. భవిష్యత్తులో సుదూర లక్ష్యాలను ఛేదించే క్షిపణి వ్యవస్థలకు ఇది ఆసరాగా నిలిచి, వైమానిక అవసరాలను తీర్చగలదని శాస్త్రవేత్తలు తెలిపారు.

ఇదీ చూడండి:హైపర్​సోనిక్​ సాంకేతికత ప్రయోగం పూర్తి వివరాలు